SQO-da alǵash ret epılepsııamen aýyratyn naýqasqa ota jasaldy
PETROPAVL. KAZINFORM – Soltústik Qazaqstan oblysynyń kópbeıindi aýrýhanasynda kezbe júıkesi stımýlıatoryn ornatý boıynsha alǵashqy ota sátti ótti.
«Áleýmettik medıtsınalyq saqtandyrý qory» KEAQ SQOF baspasóz qyzmetiniń málimetinshe, Astana qalasynyń neırohırýrg dárigeri jáne epıleptology Azat Shpekov tájirıbesimen bólisti. Epılepsııamen aýyratyn áıelge ota oblystyq kópbeıindi aýrýhananyń neırohırýrgııalyq bólimshesinde jasaldy.
Mamandardyń aıtýynsha, kezbe júıkesi stımýlıatory — VNS ornatý, ádette, basqa ádister nátıje bermegen kezde qoldanylyp, emdeýdiń sońǵy kezeńi bolyp esepteledi.
— Kezbe júıkesin yntalandyrý farmakorezıstentti epılepsııanyń aýyr túrimen aýyratyn naýqastardyń jaǵdaıyn jaqsartýǵa kómektesedi. Bul aǵzanyń epılepsııaǵa qarsy júıesin yntalandyrýǵa múmkindik beredi. VNS operatsııasy kezinde moıyn-buǵana mańynda eki tilik jasalady. Elektrod oratylyp, ol kishkentaı chıppen baılanystyrylady. Osy arqyly epılepsııaǵa qarsy titirkendirgishter teri astyna ımplantatsııalanatyn stımýlıatordan mıǵa jiberiledi. Bul ustamanyń damýyn boldyrmaýǵa kómektesedi.
Naýqasqa magnıtti bilezik taǵylady. Ustama bastalaıyn dep jatqan kezde bilezikti keýdege jaqyndatyp, toqtatýǵa bolady. VNS qoldaný patsıentterdiń ómir sapasyn jaqsartady, - deıdi oblystyq kópbeıindi aýrýhananyń ordınator dárigeri Balhar Shatýev.
Ota jasalǵan syrqattyń jasy — 45-te. Ol bes jyldan artyq epılepsııamen aýyrǵan. Dári-dármek keıingi kezde kómektespeı, saldarynan preparattardyń mólsherin ulǵaıtýǵa týra kelgen eken. MÁMS aıasynda áıelge qymbat ota tegin jasaldy.
Buǵan deıin SQO-da bıyl ınsýlt alǵandardyń sany artqanyn jazǵan edik.