SQO-da alǵash ret balǵa arnalǵan kórme-baıqaý ótti

PETROPAVL. QazAqparat – Soltústik Qazaqstan oblysynda alǵash ret bal kórmesi-baıqaýy uıymdastyryldy. Óńirde bul sala damyp keledi, sońǵy jyldary omartashylardy tipti oqý ornynda arnaıy daıarlaıtyn bolǵan, dep habarlaıdy QazAqparat tilshisi.

SQO-da qazirgi ýaqytta 2 myńnan astam adam omartashylyqpen aınalysady. Olar jylyna 600 tonna bal óndiredi. Bul óńirdegi óte tez damyp kele jatqan salalardyń biri. Sondyqtan Petropavldaǵy kolledjderdiń birinde omartashylyqqa arnaıy oqytatyn bolǵan.

«Omartashylyq aýyl sharýashylyǵymen tyǵyz baılanysty. Qazir sharýalar aralarǵa azyq bolatyn maıly daqyldardyń alqabyn ulǵaıtyp jatyr. Shabyndyq jerler de kóbeıgen. Bul salaǵa bilikti mamandar kerek. 2018 jyldan bastap Petropavlda omartashy mamandary daıarlana bastady. Osy aralyqta bul mamandyqty 43 adam alyp shyqty. Olardyń 39-y jumys istep jatyr. Olardyń ishinde 11-i otbasylyq bıznes ashty», - deıdi SQO bilim basqarmasynyń basshysy Názir Jáshibekov.

Omartashylar memlekettik-jekeshelik áriptestik aıasynda daıarlanyp, jyl saıyn bilim berý tapsyrysy jasalady. Bul kolledj SQO-nyń omartashylar qaýymdastyǵymen tyǵyz baılanysta jumys istep keledi. Stýdentter Qyzyljar aýdany Ivanovo eldi mekeninde ornalasqan oqý ornynyń sharýashylyǵynda óndiristik tájirıbeden ótedi. Jeke kásipkerlermen de tyǵyz baılanys ornatylǵan. Olar stýdentterdi qýana ózderine tájirıbeden ótýge alady. Solardyń biri - Oleg Gavrılov omartashylyqpen 20 jyldan astam ýaqyt aınalysyp keledi.

«Biz bul salada elimiz boıynsha kóshbasshy bola alamyz. Oǵan óńirdiń áleýeti joǵary. Osylaısha Shyǵys Qazaqstan oblysyna báseke týdyra alamyz. Biz basqa oblystarǵa, kórshi Reseıge jármeńkelerge jıi baramyz. Balymyz suranysqa ıe, aq qaıyńdar ólkesiniń baly dep izdep júrip, talasa alady. «, - deıdi Oleg Gavrılov.

Qazir kolledjde 200-ge jýyq stýdent bar. Onyń 30-y – omartashy mamandyǵyna oqyp jatyr. Balalar 2 jylǵa jýyq ýaqyt bilim alady. Búgin oqý ornynda jaz boıǵy eńbektiń nátıjesi qorytyndylandy.

«Búgin bal kórmesin ótkizip jatyrmyz. Oǵan bizdiń stýdentter tájirıbeden ótetin áleýmettik áriptesterimiz – óńirdiń kásiporyndary qatysyp jatyr. Ónimderin óz isin ashqan bizdiń túlekterimiz ákelip otyr. Jazda ózdiginen omarta qoıǵan stýdentterimiz de qatysyp jatyr. Bul baldyń barlyǵy – bıylǵy jyldyń ónimi.

Baıqaý 6 atalym boıynsha ótip jatyr. Ár ónimniń dámin tatyp, daýys berý arqyly úzdigin anyqtaımyz. Jeńimpazdarǵa baǵaly syılyqtarymyz bar. Alǵash ret ótip otyr, sondyqtan bıyl kolledjde uıymdastyrýǵa sheshim qabyldadyq. Keler jyly oblys deńgeıinde ótkizýdi josparladyq», - deıdi kolledj dırektory Anatolıı Grıaznov.