SQO-da áleýmettik medıtsınalyq saqtandyrý qoryna 5,5 mlrd teńge jınaldy

PETROPAVL. QazAqparat – Soltústik Qazaqstan oblysynyń jumys berýshileri men jeke kásipkerleri mindetti áleýmettik medıtsınalyq saqtandyrý úshin qorǵa 5,5 mlrd teńge aýdarym jasady, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ Soltústik Qazaqstan fılıaly óńir boıynsha qorǵa sońǵy aıdaǵy túsimder týraly aqparat berdi.

«2017 jyldyń birinshi shildesinen bastap jaldamaly qyzmetkerler úshin jumys berýshiler aýdarymdar túrinde tólemder jasap jatyr. Barlyq túsken qarajat senimgerlik basqarý sharty boıynsha Ulttyq bankte saqtalady jáne keıin mindetti áleýmettik medıtsınalyq saqtandyrý aıasynda kórsetiletin qyzmetterdi tóleýge jiberiledi. MÁMS boıynsha medıtsınalyq kómek kórsetý bastalǵanǵa deıin áleýmettik medıtsınalyq saqtandyrý qory tegin medıtsınalyq kómektiń kepildik berilgen kólemin bıýdjet arqyly qarjylandyrady», - dedi «Áleýmettik medıtsınalyq saqtandyrý qory» KEAQ Soltústik Qazaqstan fılıalynyń dırektory Larısa Gordeeva.

Qazirgi tańda qorda barlyǵy 234 mlrd teńge jınaqtalǵan, onyń 224,8 mlrd teńgesin jumys berýshiler salsa, 8,9 mlrd teńgesi jarna retinde jeke kásipkerler men azamattyq-quqyqtyq sıpattaǵy shart boıynsha jumys isteıtin tulǵalardan túsken. 2020 jyldyń 1 qańtarynan bastap olardyń qataryna jeke kásipkerler, sharýa qojalyqtarynyń basshylary, jeke tájirıbemen aınalysatyn tulǵalar, jaldamaly qyzmetkerler, derbes tóleýshiler qosylady. Jeńildigi bar sanatqa kiretin azamattar úshin de memleket aýdarym jasaı bastaıdy.

«Áleýmettik medıtsınalyq saqtandyrý qory» KEAQ Soltústik Qazaqstan fılıaly baspasóz qyzmetiniń málimetinshe, medıtsınalyq saqtandyrýǵa qatysty másele týyndaǵan jaǵdaıda 1406 biryńǵaı nómirine tegin habarlasyp, ortalyq keńesshilerinen jaýap alýǵa bolady. 9 jeltoqsannan bastap qońyraýlar saǵat 9.00-den 24.00-ge deıin qabyldanady. 2020 jyldyń 1 qańtarynan bastap keńesshiler táýlik boıy jumys istemek.