SQO-da aldaǵy eki jylda taǵy 9 qoqys polıgony salynady
PETROPAVL. QazAqparat – Soltústik Qazaqstan oblysynda qatty turmystyq qaldyqtar polıgondarynyń 16-synyń ǵana qujattary talapqa saı, dep habarlaıdy QazAqparat tilshisi.
SQO óńirlik kommýnıkatsııalar qyzmetinde Ekologııa departamentiniń basshysy Azamat Bektasov oblystaǵy ekologııalyq ahýalǵa toqtaldy.
Vedomstvo jetekshisiniń aıtýynsha, Petropavldaǵy qatty turmystyq qaldyqtar polıgonynyń paıdalaný merzimi aıaqtalýǵa jaqyn. Sondaı-aq bul nysan qazirgi jaǵdaıda qoldanystaǵy ekologııalyq jáne sanıtarlyq normalarǵa saı emes. Jıi órtenetin bolǵandyqtan qorshaǵan ortaǵa zalal keltirip jatyr.
«Petropavl qatty turmystyq qaldyqtar polıgonynyń jobalyq qýaty - 1 488,671 myń tonna. Jyl basynda bul nysan 79,6 %-ǵa toldy, ıaǵnı qazir munda 1 184,793 myń tonna qaldyq jatyr. 2024 jyly Petropavlda qalalyq qatty turmystyq qaldyqtar polıgonynyń paıdalaný merzimi aıaqtalady. Osylaısha, qazirgi zamanǵy jańa polıgon salý jáne jumys istep turǵan polıgondy rekýltıvatsııalaý jóninde jumystardy júrgizý qajettigi týyndaǵan», - deıdi Azamat Bektasov.
Oblys aýdandarynda zańdastyrylǵan qoqys polıgondarynyń joqtyǵynan stıhııalyq qoqys oryndary paıda bolǵan. Búgingi kúni oblys boıynsha qaldyqtardy ornalastyrý nysandarynyń jalpy sany 456 bolsa, onyń ishinde 440-y zańzys jumys istep jatyr, tek 16-synyń ǵana qujattary túgel.
«Qyzyljar aýdany Báıterek aýylynyń mańynda ornalasqan ruqsat etilmegen qoqys úıindisinde qaldyqtar jıi janady. Bul polıgondy joıý maqsatynda oblystyq mamandandyrylǵan aýdanaralyq ekonomıkalyq sotyna júgindik. Sot talap aryzdy qanaǵattandyrdy, Beskól aýyldyq okrýgi ákiminiń apparaty qorshaǵan ortany qalpyna keltirý jónindegi is-sharalardy oryndaı otyryp, osy úıindini joıýǵa mindetteldi. Osyǵan baılanysty jergilikti atqarýshy organdar qazirdiń ózinde ekologııalyq jáne sanıtarlyq talaptarǵa sáıkes keletin jańa polıgondy salý úshin oryndy aıqyndaýy qajet», - deıdi basqarma basshysy.
Jol kartasyna sáıkes 2023 jylǵa deıingi merzimde oblystyń 9 aýdanynda jańa qatty turmystyq qaldyqtar polıgondaryn salý kózdelgen.
«Qazaqstan Ǵarysh Sapary «UK» AQ málimetteri boıynsha, óńirde qaldyqtardy tógýdiń 370 sanktsııalanbaǵan orny anyqtaldy, onyń 46-synda qoqys tastaıtyn jerlerdiń shekarasy buzylǵan. Qaldyqtardy ruqsatsyz tógý oryndaryn rastaý úshin departament 304 reıd ótkizdi, tek 9-y ǵana rastalmady. Búgingi tańda bul oryndardyń 222-si nemese 68,5% joıyldy.
