SQO-da aldaǵy eki jylda 46 medıtsınalyq mekeme salynbaq
SQO qurylys, sáýlet jáne qala qurylysy basqarmasy baspasóz qyzmetiniń málimetinshe, medıtsınalyq mekemeler óńirdiń ár aýdanynda boı kótermek. Bıyl 9 nysan qoldanysqa beriledi dep josparlanǵan.
Qyzyljar aýdany Prıbrejnoe aýylynda dárigerlik ambýlatorııanyń qurylysy júrip jatyr. «Aýyldyq densaýlyq saqtaýdy jańǵyrtý» ulttyq jobasy aıasynda el qazynasynan 455 mln teńge bólinip, osy jyldyń mamyr aıynda qurylysshylar iske kiristi.
«Nysannyń irgetasyn quıyp jatyrmyz. Jumysqa 5 maman men 2 tehnıka jumyldyryldy. Qurylys materıaldary otandyq ónim. Kirpish Podgornoe aýylyndaǵy zaýyttan jetkiziledi. Jumys kestege saı júrgizilip jatyr. Jalpy, bizdiń kompanııa oblys boıynsha 6 medıtsınalyq mekemeni salyp jatyr. M.Jumabaev aýdanynda 2 dárigerlik ambýlatorııa, taǵy ekeýin Qyzyljar aýdanynda jáne Ǵ.Músirepov atyndaǵy aýdanda 2 akýsherlik pýnkt qurylysyn bastadyq», - deıdi «Gradstroıservıs» JShS SQO fılıalynyń dırektory Sársenbaı Asylbekov.
Dárigerlik ambýlatorııada 2 maman eńbek etedi. Bul jerde alǵashqy medıtsınalyq kómek kórsetilip, tıisti mamanǵa joldama beriledi.
«Dárigerlik ambýlatorııa barlyq talapqa saı bolmaq. Kadr máselesi de sheshiledi. Qazirgi tańda eldi mekenderge jumys isteýge keletin dárigerlerge tólenetin kótermeaqy mólsheri de artty. Qalaǵa jumysqa kelgenderge 1,5 mln, aýyldarda eńbek etetinderge 2,5 mln teńge beriledi», - deıdi SQO Densaýlyq saqtaý basqarmasy basshysynyń orynbasary Nurbolat Imanjanov.
SQO Qyzyljar aýdany Prıbrejnoe eldi mekeninde búginde 1700 úı bar. Qazir turǵyndar alǵashqy medıtsınalyq kómekti eski ǵımaratta alyp otyr. Bıyl kúzde aýyl halqy jańa dárigerlik ambýlatorııaǵa kelip, em-dom ala alady.
Jalpy, Ulttyq joba aıasynda SQO-da eki jylda 46 emdeý mekemesi boı kótermek. Osy maqsatqa respýblıkalyq bıýdjetten 2 mlrd 400 mlnǵa jýyq teńge bólindi.
