SQO-da aldaǵy demalys kúnderi taǵy da boran soǵady
PETROPAVL. QazAqparat – Soltústik Qazaqstan oblysynda antıtsıklonnyń áserinen aldaǵy demalys kúnderi kúnniń raıy taǵy da buzylyp, qar jaýyp, boran bolady dep kútilýde, dep habarlaıdy QazAqparat tilshisi.
SQO tótenshe jaǵdaılar departamentiniń málimetinshe, qys bastalǵaly óńirde aýa raıynyń qolaısyzdyǵynan respýblıkalyq, oblystyq mańyzy bar joldar 28 ret jabylǵan. Soltústik Qazaqstanda boranda qar alyp qalý qaýpi joǵary 396 ýchaske bar. Onyń jalpy uzyndyǵy - 1180 km. Mamandar bul jerlerdi únemi nazarda ustaıdy.
«Bıyl qysta joldardy qardan arshýǵa myńǵa jýyq tehnıka ázirlendi. Qystyń kúrdeli bolýyna baılanysty arnaıy tehnıka joldardy tazalap úlgermeı jatyr. Shalǵaı aýyldarǵa jol ashý ońaı emes. Búgin tańerteń joly joq 13 eldimeken qaldy. Búgin-erteń bul jumystar aıaqtalady», - deıdi SQO TJD bastyǵynyń orynbasary Murat Qanǵojınov.
5 naýryzdan bastap TJD oblystyq jedel shtab jumys istedi. Qutqarýshylar táýlik boıy kezekshilik etip, jolda qar qursaýynda qalǵandardy evakýatsııalady. Medıtsınalyq kómek kerek bolǵandarǵa arnaıy tehnıkany jumyldyrdy.
Bul kúnderi Mamlıýt, Esil aýdandarynda qatty boranǵa baılanysty elektr jelileri úzilip, birneshe aýyldyń jaryqsyz qalǵan kezderi boldy. Mamannyń aıtýynsha, «SevKazEnergo» mamandary oqıǵa ornyna baryp, jóndedi. Qazirgi ýaqytta másele joq.
«Qys bıyl ketýge asyǵar emes. Aldaǵy demalys kúnderi antıtsıklonnyń ásserinen taǵy da qalyń qar jaýyp, jel turady. Sol sebepti qaýipsizdik sharalaryn ustanyp, jolǵa shyqpaýdy eskertemiz. Jol júrýge asa qajettilik bolǵan jaǵdaıda kólikte janarmaı qory, jyly kıimder bolýy kerek.
Jalpy qys bastalǵaly halyqty eskertip, 87 ret sms habarlama jiberdik. Soǵan qaramastan turǵyndar arasynda boranda jolǵa shyǵatyndar bar. Bastaryńyzdy qaýip-qaterge tikpeýlerińizdi suraımyz», - deıdi Murat Qanǵojınov.
