SQO-da aldaǵy kúnderi túnde qar jaýady

PETROPAVL. KAZINFORM — Soltústik Qazaqstan oblysynda turaqsyz aýa raıy saqtalyp, aldaǵy kúnderi qar jaýady dep boljanǵan.

«Qazgıdromet» RMK SQO fılıalynyń málimetinshe, 16-20 sáýir aralyǵynda óńir Soltústik tsıklon men onyń atmosferalyq fronttarynyń yqpalynda bolady. Fronttardyń ótýi kezinde jaýyn-shashyn, negizinen jańbyr jaýady. Kúndiz 16 cáýirde 12-17 gradýs, 17-20 sáýir aralyǵynda 6-11 gradýs aralyǵynda jyly bolady.

Sınoptıkterdiń boljamynsha, 16 sáýir kúni túnde -1, -6 gradýs aralyǵynda bolyp, qar aralas jańbyr jaýady. Qolaısyz aýa raıy 18 sáýirde de saqtalyp, túnde -3 gradýsqa deıin tómendeıdi, oblystyń batysynda, soltústiginde, shyǵysynda qar aralas jańbyr jaýady.

Turaqsyz aýa raıy sáýirdiń úshinshi onkúndiginde de saqtalady. Aýa temperatýrasynyń túnde 0-5-ten 5-10-ǵa deıin, kúndiz 10-15-ten 18-23-ke deıin aýytqýy boljanǵan.

Turaqsyz aýa raıyna baılanysty Petropavldaǵy nysandardy jylytý jelisinen ajyratý keıinge qaldyryldy.

— SQO-da jylytý maýsymyna daıyndalý jáne ótkizý qaǵıdalarynyń 5-tarmaǵyna sáıkes jylytý maýsymynyń aıaqtalýy táýliktik ortasha temperatýra +10°C joǵary jáne aýa raıynyń odan ári jylynýy boljanǵanda aıqyndalady. Jylýdy toqtatý týraly sheshimdi turaqty oń temperatýranyń úshinshi táýliginde jergilikti atqarýshy organdar jáne energııamen jabdyqtaýshy uıymdar birlese qabyldaıdy. Jylytý maýsymy aıaqtalǵannan keıin turǵyn úılerge qyzmet kórsetetin uıymdar energııa berýshi uıymmen birlesip ortalyq jylytýdy óshiredi jáne shart talaptaryna sáıkes ystyq sýmen qamtýdyń jazǵy shemasyna kóshedi, — deıdi qala ákiminiń baspasóz hatshysy Ásem Aıtýlova.

Buǵan deıin Óskemende kún sýyp ketkendikten jylýdy óshirý keıinge shegerilgenin jazǵan edik.