SQO-da alaıaqtyq jasaǵan ýchaskelik ınspektor 1,1 mln teńge aıyppul tóleıdi
PETROPAVL. QazAqparat – Soltústik Qazaqstan oblysynda qyzmet babyn paıdalanyp, alaıaqtyqqa barǵan ýchaskelik polıtsııa ınspektoryna qatysty sot úkimi shyǵyp, oǵan 1 mln 125 myń teńge aıyppul tóleý jazasy kesildi, dep habarlaıdy QazAqparat tilshisi.
Petropavldaǵy «Antikor ortalyǵy» servıstik ortalyǵynda Sybaılas jemqorlyqqa qarsy is-qımyl Agenttiginiń SQO boıynsha departament basshysy Ernar Baıanǵazın sybaılas jemqorlyqqa qatysty qylmystyq isterdiń aldyn alý jáne jolyn kesý maqsatynda jıyn ótkizdi.
Ernar Baıanǵazınniń aıtýynsha, 11 tamyz kúni SQO Sybaılas jemqorlyqqa qarsy qyzmettiń Call-ortalyǵyna M.Jumabaev aýdandyq polıtsııa bóliminiń ýchaskelik ınspektory men onyń taǵylymgerine qatysty turǵynnan aryz túsedi.
Tergeý barysynda polıtsııanyń ýchaskelik ınspektorynyń qyzmet laýazymyn paıdalanyp, alaıaqtyqqa barǵany anyqtaldy.
8 tamyz kúni polıtsııanyń ýchaskelik ınspektory men onyń taǵylymgerine jergilikti dúkenderdiń biriniń ıesi shaǵymdanǵan. Áıel odan belgisiz bireýdiń polıtsııa maıorymyn dep ózin tanystyryp, 4 myń 200 teńge qaryzǵa alyp, bermeı júrgenin aıtqan. Tártip saqshylaryn qaryzyn qaıtarýǵa kómektesýdi suraǵan.
10 tamyz kúni polıtsııanyń ýchaskelik ınspektory men onyń taǵylymgeri jumys ýaqytynda jalǵan maıordy taýyp, oǵan qaryzǵa baılanysty dúken ıesinen jazba túrde aryz túskendigin ótirik aıtqan. Aqshany qaıtaryp, tatýlasý qajettigin aıtqan.
«Dúkenge qaryz sol kúni-aq qaıtarylǵan. Alaıda ýchaskelik ınspektor joq aryzdy alǵa tartyp, máseleni oń sheshý úshin dúkennen qaryz alǵan adamnan 150 myń teńge talap etken. Qylmystyq jaýapkershilikke tartylýdan qoryqqan turǵyn onyń zańsyz talabyn oryndamaq bolýǵa kelisedi. 11 tamyz kúni polıtsııa qyzmetkeri aqsha alý kezinde ustaldy», - deıdi SQO Sybaılas jemqorlyqqa qarsy qyzmettiń basshysy Ernar Baıanǵazın.
10 qyrkúıek kúni Petropavl qalalyq soty polıtsııanyń ýchaskelik ınspektoryna úkim shyǵardy. Eks-polıtseı alǵan parasyna sáıkes 7,5 ese mólsherde – 1 mln 125 myń teńge aıyppul tóleıtin boldy. Sondaı-aq ómir boıyna memlekettik qyzmetke ornalasý quqyǵynan jáne polıtsııanyń aǵa leıtenanty sheninen aıyryldy.
«Qylmystyń jasalýyna basshylyq tarapynan durys baqylaýdyń bolmaýy sebep. Qyzmetkerler jumys ýaqytynda qyzmettik kólikti óz maqsatynda jumsaıdy. Tikeleı basshylaryn eskertpeı jáne negizsiz jedel-izdestirý sharalaryn júrgizedi. M.Jumabaev aýdandyq polıtsııa bólimi basshylyǵy jumys kúnin josparlamaıdy», - deıdi departament basshysy.
Osyǵan oraı sybaılas jemqorlyqqa qarsy qyzmet zańǵa súıene otyra M.Jumabaev atyndaǵy aýdandyq polıtsııa bóliminiń basshylyǵyn tártiptik jaýapkershilikke tartýǵa, jeke qurammen sybaılas jemqorlyqqa qarsy bilimderin jetildirý boıynsha sabaq ótkizip otyrýǵa jáne kúndelikti jumys kúnin josparlaýǵa usynys engizdi.
