SQO-da alaıaqtyq jasaǵan sheneýniktiń jazasy prokýrorlardyń aralasýynan keıin qatańdatyldy
PETROPAVL. QazAqparat – Soltústik Qazaqstan oblysy Qyzyljar aýdanynyń memlekettik kirister basqarmasynyń basshysy M.Aǵajanov alaıaqtyq jasaǵany úshin endi aıyppul tólemeıdi, jazasyn óteýge túzetý mekemesine jiberildi, dep habarlaıdy QazAqparat tilshisi.
SQO prokýratýra baspasóz qyzmetiniń málimetinshe, Qyzyljar aýdanynyń memlekettik kirister basqarmasynyń basshysy M.Aǵajanov búgin túzetý mekemesine jazasyn óteýge jiberildi.
Ol fıskaldyq organnyń ókili bola otyra, salyqqa qatysty máseleni sheshýge kómekteskeni úshin kásipkerdi aldaý arqyly 1 mln 250 myń teńge somasynda zańsyz materıaldyq syıaqy alǵan. Aǵajanovtyń is-áreketi QR QK 190-baby 3-bóligi 2-tarmaǵy «memlekettik fýnktsııalardy oryndaýǵa ýákilettik berilgen adamnyń qyzmet babyn paıdalana otyryp alaıaqtyq jasaý» boıynsha qaraldy.
Petropavl qalalyq soty M.Agajanovty kináli dep tanyp, atalǵan fakti boıynsha oǵan aıyppul saldy.
Oblys prokýratýrasy istiń mán-jaıyn eskere otyryp, muny tym jumsaq úkim dep sheshti, osyǵan baılanysty zańdy túrde óz narazylyǵyn bildirdi.
Apellıatsııalyq sot prokýratýranyń dálelderimen kelise otyryp, M.Agajanovty 3 jylǵa bas bostandyǵynan aıyrýǵa úkim shyǵardy. Sondaı-aq eks-sheneýnik ómir boıyna memlekettik qyzmette qyzmet atqarý quqyǵynan aıyryldy. Sot qaýlysy sol kúni zańdy kúshine endi.
