SQO-da alaıaqtyq jasaǵan túrme bastyǵy sottaldy

PETROPAVL. KAZINFORM – Soltústik Qazaqstan oblysy Olshanka eldi mekeninde ornalasqan túzeý mekemesiniń eks-bastyǵyna sot úkimi shyqty. 

Bıyl aqpan aıynda SQO boıynsha qylmystyq-atqarý júıesi departamentiniń № 52 mekemesiniń bastyǵy para aldy degen kúdikpen ustalǵan edi. 

Ol alaıaqtyq jasaýǵa árekettengeni jáne para berýge ıtermelegeni úshin jaýapqa tartyldy.

Sot materıaldaryna sáıkes, 45 jastaǵy Rústem Rahmetov túzeý mekemesin 2024 jyldyń jeltoqsan aıynan bastap basqarǵan. Ótken jyldyń sońynda ol mekemedegi jazasyn óteýshiniń Qyzyljar aýdandyq sotqa jazasyn jeńildetý úshin ótinish bergenin bilip, oń sheshim qabyldanýyna kómektese alatynyn aıtqan. Rahmetov laýazymdy tulǵalarǵa 200 myń teńge para berýdi usynyp, ol qarajatty aldaý arqyly qaltasyna baspaq bolady. Biraq sottalǵan azamat ýaqyt óte kele UQK SQO boıynsha departamentine habarlasyp, shara qoldanýdy suraıdy. Nátıjesinde 19 aqpan kúni arnaıy belgisi bar aqshany jumys kabınetinde alǵan Rahmetovty departament qyzmetkerleri óz páterinde ustady. 

Aıyptalýshy kinásin tolyq moıyndady. 

Petropavl qalalyq soty oǵan negizgi jaza retinde 3 mln teńge aıyppul taǵaıyndady. Sonymen qatar ol ómir boıyna memlekettik qyzmette, sýdıa, jergilikti ózin-ózi basqarý organdarynda jáne kvazımemlekettik sektorda jumys isteý quqyǵynan aıyryldy. Budan bólek, «ádilet podpolkovnıgi» arnaıy ataǵy kúshin joıdy.

Sot aıyppuldy úkim zańdy kúshine engennen keıin 1 aı ishinde tóleýdi mindettedi. Eger bul talap oryndalmasa, aıyppul májbúrli túrde óndirilip, tipti bas bostandyǵynan aıyrý jazasyna aýystyrylýy múmkin. 

Sonymen qatar odan memleket paıdasyna 31 myń teńgeden astam sot shyǵyndary jáne jábirlenýshilerge arnalǵan qorǵa 86 500 teńge óndirildi.

Sot úkimi ázirge zańdy kúshine engen joq. 

Buǵan deıin «Qulager» HK komandasynyń bastyǵy úsh jylǵa sottalǵanyn jazǵan edik.