Sý máselesi: Qazaqstan-Ózbekstan úkimetaralyq komıssııasy qurylady
ASTANA. KAZINFORM – Búgin Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy transshekaralyq sý obektilerin birlesip basqarý jáne utymdy paıdalaný týraly kelisimdi ratıfıkatsııalaý týraly» Zań maquldandy.
Kelisimge 2025 jylǵy 15 qarashada Memleket basshysy Qasym-Jomart Toqaevtyń Ózbekstan Respýblıkasyna memlekettik sapary aıasynda qol qoıyldy.
Kelisimniń maqsaty - transshekaralyq sý obektilerin birlesip basqarý jáne utymdy paıdalaný.
- Bul sý obektileri Qyzylorda jáne Túrkistan oblystary halqyn sýmen qamtamasyz etýde, sondaı-aq aýyl sharýashylyǵy men energetıka salalaryn damytýda mańyzdy ról atqarady. Bir mańyzdy máselege erekshe toqtalǵym keledi. Kelisimniń úshinshi babynda alǵash ret ekijaqty deńgeıde Syrdarııa ózeni basseıniniń sý resýrstaryn keshendi paıdalaný jáne qorǵaý shemalary resmı túrde engizilip, eki tarap úshin mindetti negiz retinde bekitildi. Atalǵan shemalar Keńes Odaǵy kezeńinde ázirlengen jáne 1992 jyldan beri Ortalyq Azııa memleketteriniń barlyǵy olardy sý bólýdiń negizgi qujaty retinde moıyndap keledi. Buǵan deıin taraptar osy qaǵıdattardy jalpy túrde qoldaıtynyn ǵana rastap kelse, endi olar kelisimde naqty bekitilip otyr. Bul óte mańyzdy qadam, óıtkeni sý bólý júıesi qosymsha quqyqtyq qorǵanysqa ıe bolady jáne ony birjaqty tártippen qaıta qaraý múmkindigi shekteledi, - dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Odan bólek Kelisimniń preambýlasynda taraptar 1992 jylǵy Transshekaralyq sý aǵyndary men halyqaralyq kólderdi qorǵaý jáne paıdalaný konventsııasy jáne 1997 jylǵy Halyqaralyq sý joldaryn sharýashylyqtan tys paıdalaný quqyǵy týraly eki negizgi halyqaralyq konventsııa aıasyndaǵy mindettemelerdi rastaıdy. Bul konventsııalar transshekaralyq sý yntymaqtastyǵynyń jalpyǵa birdeı tanylǵan qaǵıdattaryn belgileıdi. Atap aıtqanda, transshekaralyq zııan keltirýge jol bermeý, sý resýrstaryn ádil jáne utymdy paıdalaný, aqparat almasý jáne ekinshi tarapqa áser etýi múmkin kez kelgen qyzmetti josparlaý kezinde mindetti konsýltatsııalar júrgizýdi kózdeıdi.
- Ózbekstan bul konventsııalarǵa múshe elderdiń qatarynda. Kelisimniń 4-babyna sáıkes taraptar naqty ýaqyt rejıminde aqparat almasýǵa múmkindik beretin sýdy esepke alýdyń biryńǵaı avtomattandyrylǵan júıesin engizedi. Bul sý paıdalaný kólemine qatysty kelispeýshilikterdiń aldyn alýǵa múmkindik beredi. Kelisimde ınfraqurylymdy rekonstrýktsııalaý men jańǵyrtýdy birlesip qarjylandyrý, shekara mańyndaǵy aýmaqtardaǵy kollektorlyq-drenajdyq júıelerdi kútip ustaý, tótenshe jaǵdaılar kezindegi is-qımyldardy úılestirý, sondaı-aq memleketaralyq obektilerge qyzmet kórsetetin personal men tehnıkanyń shekaradan ótý tártibin jeńildetý máseleleri de kózdelgen. Sonymen qatar Kelisimdi tıimdi iske asyrý maqsatynda Qazaqstan-Ózbekstan úkimetaralyq komıssııasy qurylady. Komıssııa jylyna eki ret eki el aýmaǵynda kezekpen otyrys ótkizedi. Onyń aıasynda vegetatsııalyq jáne vegetatsııaaralyq kezeńderge arnalǵan sý resýrstarynyń jyl saıynǵy boljamdary kelisiledi, sý sharýashylyǵy qurylystaryn paıdalaný jáne jóndeý máseleleri qaralady. Kelisim bes jyl merzimge jasalady jáne keıin avtomatty túrde uzartylady, - dedi vıtse-mınıstr.
Buǵan deıin habarlanǵandaı, eki el arasynda transshekaralyq sý resýrstaryn basqarý boıynsha ortaq tásilder ázirlengenin jazǵan edik.
