SQO-da alaıaqtar sanepıdqyzmettiń atyn jamylyp, kásipkerlerdi bopsalaıtyn bolǵan
PETROPAVL. KAZINFORM – Soltústik Qazaqstan oblysynda sońǵy kezderi ózderin sanıtarııalyq-epıdemıologııalyq qyzmettiń basshysy nemese mamany retinde tanystyrǵan alaıaqtardyń kásipkerlerge telefon soǵýy nemese barý faktileri jıilegen.
Vedomstvo mamandarynyń aıtýynsha, osyndaı birneshe jaǵdaı tirkelgen. Kóbine alaıaqtar kásipkerlik nysandaryna telefon shalyp nemese kelip, mekemede zań buzýshylyqtar bar ekenin alǵa tartady. Keıin olar «bul joly kóz juma salamyz» degen jeleýmen aqsha suraıdy nemese eger tólem jasalmasa, birneshe ese artyq aıyppul salatynyn aıtyp qorqytady.
Alaıaqtyqtyń bul túri tek kásipkerlerge ǵana emes, qoǵamdyq qaýipsizdikke de qater tóndiredi. Sondyqtan árbir azamat muqııat bolyp, zańdy bilýi qajet. Máselen sanıtarııalyq-epıdemıologııalyq qyzmettiń qyzmetkerleri árqashan qyzmettik kýáligin kórsetedi. Barlyq tekserýler quqyqtyq statıstıka jáne arnaıy esepke alý organdarynda resmı tirkeledi. Qyzmetkerler eshqashan qolma-qol tólemdi nemese jeke bank derekterin talap etpeıdi.
Sondaı-aq resmı is-áreketter tek zańnamamen bekitilgen reglamentke saı júzege asyrylady.
Al kúmán týyndaǵan jaǵdaıda, mamandar SQO sanıtarııalyq-epıdemıologııalyq baqylaý departamentine nemese aýmaqtyq basqarmasyna habarlasýdy suraıdy.
- Ózińizdi qorǵaý úshin qysym men qorqytýǵa kónbeńiz. Barlyq aqparatty tek resmı derekkózder arqyly tekserińiz. Kúdikti qońyraý shalynsa men kelse - birden polıtsııaǵa habarlańyz, - deıdi sanepıdqyzmet mamandary.
Buǵan deıin SQO-da kúnde úsh adam ınternet-alaıaqtardan zardap shegetinin jazǵan edik.