SQO-da alaıaqtar eki kúnde 3 adamdy aldap, 13 mln teńgeni qoldy etti
PETROPAVL. KAZINFORM - Soltústik Qazaqstan oblysynda sońǵy on kún ishinde ınternet-alaıaqtyqtyń rezonansty úsh oqıǵasy tirkeldi, kelgen shyǵyn – 13 mln teńge.
SQO polıtsııa departamenti baspasóz qyzmetiniń málimetinshe, barlyq jaǵdaıda alaıaqtar telefonǵa kelgen SMS-kodty aıtýǵa májbúrlegen.
3 maýsymda Petropavl qalasynyń polıtsııasyna 25 jastaǵy turǵyn júgindi. Alaıaqtar oǵan WhatsApp arqyly habarlasyp, ózderin «Qazposhta» qyzmetkerimiz dep tanystyrǵan. Sálemdeme jetkizilýin rastaý úshin kelgen SMS-kodty aıtýyn suraǵan. Keıin «bank qyzmetkerimiz» dep taǵy habarlasyp, onyń atyna nesıe resimdelip jatqanyn aıtyp, birneshe banktiń qosymshalaryn júkteýge jáne onlaın nesıe resimdeýge kóndirgen. Saldarynan alaıaqtardyń shotyna 2 370 000 teńge aýdarylǵan.
4 maýsymda Aıyrtaý aýdanynyń polıtsııasyna Lavrovka aýylynyń turǵyny aryzdandy. Alaıaqtar qońyraý soǵyp, ózderin bank qyzmetkerimiz dep tanystyrǵan. Olar 69 jastaǵy áıeldi aldap, SMS arqyly kelgen kodty aıtýǵa, sondaı-aq «vırýsqa qarsy baǵdarlamany» júkteýge kóndirgen. Osydan keıin telefony buǵattalyp, depozıtinen 4 287 000 teńge sheship alynǵan.
Sol kúni oblys ortalyǵynyń turǵyny polıtsııaǵa júgindi. Alaıaqtar oǵan baılanys operatory men bank qyzmetkerimiz dep habarlasyp, SIM-karta merzimi aıaqtalýǵa jaqyn ekenin aıtqan. Olar ony aldap, SMS-kodty aıtýǵa májbúrlep, birneshe bankten onlaın nesıe resimdeýge kóndirgen. Kelgen shyǵyn 6 457 000 teńge, bul qarjy bógde adamdardyń atyna tirkelgen shottarǵa aýdarylǵan.
- Barlyq úsh jaǵdaıda da alaıaqtar uqsas ádisterdi qoldanǵan. Olar: psıhologııalyq qysym — qorqynysh uıalatý, asyqtyrý, «shuǵyl», «sizdiń derekterińiz buzylyp jatyr» degen sózderdi qoldaný; tanymal uıymdardyń atyn paıdalaný; qosymsha ornatýǵa jáne onlaın nesıe resimdeýge májbúrleý. Qorǵaný úshin qońyraý shalýshy ózin bank ne memlekettik organ qyzmetkeri retinde tanystyrsa da, aqsha aýdarmańyz; bógde adamdardyń nusqaýy boıynsha qosymshalardy ornatpańyz; banktiń resmı saıty arqyly ózińiz qaıta qońyraý shalyńyz, - deıdi tártip saqshylary.
Jyl basynan oblysta 268 ınternet-alaıaqtyq faktisi tirkeldi.
Buǵan deıin SQO-da ózderin sanıtarııalyq-epıdemıologııalyq qyzmettiń basshysy nemese mamany retinde tanystyrǵan alaıaqtardyń kásipkerlerge telefon soǵýy nemese barý faktileri jıilegenin jazǵan edik.