SQO-da alaıaq-balger saýsaq izi arqyly ustaldy
PETROPAVL. QazAqparat - Soltústikqazaqstandyq krımınalıster alty aıdyń ishinde 550 qylmysty áshkerlegen, dep habarlaıdy QazAqparat tilshisi.
Іshki ister departamentiniń baspasóz qyzmeti atap ótkendeı, tergeýshiler, jedel qyzmetkerler men sarapshy-krımınalıster kún saıyn tergeý-jedel toptyń quramynda kezekshilikke túsedi. Qylmystyń áshkerelenip, qylmyskerlerlerdiń ustalýy ár ofıtserdiń tııanaqty jumysyna baılanysty.
Taıaýda tártip saqshylary saýsaq izi arqyly alaıaqty ustady. Krımınalıster saýsaq izderin áıeldiń sý ishken ydysynan tapqan.
«83 jastaǵy zeınetkerge orta jastaǵy áıel kelip, oǵan úıin satýdy usynady. Úı ıesi páterin satpaıtynyn aıtady. Kelgen áıel bir shyny sý surap, ájede dýa baryn aıtady jáne ony «alyp tastaýǵa» kirisedi. Áje sol kúni zeınetaqysyn alady. Áıel aqshany kórip, ony alyp qashyp ketedi», - dedi baspasóz qyzmetinen.
Jedel-krımınalıstıka basqarmasynyń bastyǵynyń m.a. Qanat Ospanovtyń aıtýynsha, vedomstvo qyzmetkerleri jarty jylda 7,5 myń jedel-izdestirý is-sharalary men tergeý áreketterine qatysqan.
«3 myń krımınalıstik zertteý júrgizdik. Onyń ishinde 118 daktıloskopııalyq jáne 75 trasologııalyq zertteý oń nátıje bergen. Jalpy, osy arqyly 553 qylmys ashyldy», - dep atap ótti Q.Ospanov.
