SQO-da alaıaq 16 epızod boıynsha sottaldy

PETROPAVL. KAZINFORM – Qazaqstan qalalarynda, negizinen Petropavlda, shyn máninde joq páterlerdi «jalǵa berip kelgen» Almaty oblysynyń 33 jastaǵy turǵyny sottaldy.

Soltústik Qazaqstan oblysy polıtsııa departamenti baspasóz qyzmetiniń málimetinshe, tártip saqshylary alaıaqty byltyr qolǵa túsirgen. Er adam páterlerdiń fotosýretterin ınternetten alyp, tanymal saıttarda habarlandyrýlar ornalastyrǵan. Habarlasqan ár klıentke páterdi áldebireýler surap qoıǵanyn aıtyp sendirgen, alaıda aldyn ala tólem jasalsa, jalǵa berýge kelisetinin aıtqan.

Bul úshin ol 5 myńnan 45 myń teńgege deıin tólem jasaýdy talap etken, al aqsha qolyna tıgen soń, aldanǵan adamnyń nómirin buǵattap, baılanysqa shyǵýdy toqtatqan.

Polıtseıler isti jan-jaqty tergep, 16 epızod boıynsha sotqa jiberdi. Qazirgi ýaqytta alaıaq shartty túrde tórt jylǵa sottaldy.

Polıtseıler qashyqtan saýda jasarda adamdardy muqııat bolýǵa shaqyrady. Eger satýshynyń áreketine senimdi bolmasańyz, ınternette taýarlar men qyzmetter týraly habarlandyrýlar boıynsha aldyn-ala tólem jasaýǵa kelispeńiz.

Jalpy byltyr SQO-da 756 ınternet-alaıaqtyq deregi tirkeldi, onyń 180-nen astamy tegin habarlandyrý servısteri jáne áleýmettik jeliler arqyly taýarlar men qyzmetterdi satýmen baılanysty.

Buǵan deıin SQO-da bank shotyn bireýlerge paıdalanýǵa bergen turǵyn endi keltirilgen shyǵyndy ózi óteıtindigin jazǵan edik.