SQO-da alaýyzdyq kúdigimen ustalǵan er adam polıtsııa qyzmetkerine tap berdi

PETROPAVL. KAZINFORM — Soltústik Qazaqstan oblysynda dinı alaýyzdyqty qozdyrý faktisi boıynsha ustalǵan kúdikti endi polıtsııa qyzmetkerine judyryq ala júgirgeni úshin de jaýap bermek.

SQO polıtsııa departamenti baspasóz qyzmetiniń málimetinshe, tártip saqshylary ınternet-keńistikke monıtorıng júrgizý barysynda dinı alaýyzdyqty qozdyrý belgileri bar materıaldy anyqtaǵan.

Ony Esil aýdanynyń turǵyny jarııalaǵany belgili boldy. 

Qazirgi ýaqytta osy derek boıynsha polıtsııa sotqa deıingi tergeý júrgizip jatyr.

Tergeý áreketteri barysynda aýdan ortalyǵynyń turǵyny mán-jaıdy anyqtaý úshin polıtsııa bólimine jetkizildi.

Tártip saqshylary tekserý maqsatymen er adamnan iPhone14 markaly uıaly telefonyn berýdi surady.

Biraq jergilikti turǵyn olardyń zańdy talabyn elemeı, qurylǵyny syndyrmaq bolǵan. 

Polıtseıler buǵan jol bermedi, biraq er adam qyzmetkerlerdiń biriniń betinen urǵan.  

«Kúdikti ustaldy. Oǵan qatysty alaýyzdyqty qozdyrý jáne bılik ókiline kúsh kórsetý faktileri boıynsha sotqa deıingi tergeý júrip jatyr. Densaýlyqqa keltirilgen zııannyń dárejesin saraptama kórsetedi», — dedi SQO PD bastyǵynyń orynbasary Asqar Muhametqalıev.

Buǵan deıin SQO-da qaraqshylyq shabýyl jasap, adamdy óltirgen aıyptalýshylardyń dáleldiń joqtyǵynan aqtalǵanyn jazǵan edik.