SQO-da aqpandaǵy aýa raıy kópjyldyq kórsetkishten jyly bolmaq

PETROPAVL. KAZINFORM – Soltústik Qazaqstan oblysynda jıyrma kúnge jýyq turǵan aıaz synyp, kún eptep jylyna bastady. Sınoptıkterdiń boljamynsha, aqpan aıynda tabıǵat tosyn minez tanytpaıdy.

«Qazgıdromet» kásiporny oblystyq fılıalynyń málimetinshe, aldaǵy aıda óńirde aýa temperatýrasy klımattyq norma dep esepteletin –13,8…–15,7 gradýstan sál joǵary bolady. Aqpandaǵy ortasha aýa temperatýrasy –12,0…–13,7 gradýs shamasynda qalyptasady. Bul kópjyldyq kórsetkishten 1 gradýsqa joǵary.

Birinshi onkúndikte túngi aýa temperatýrasy –8…–13 gradýstan –15…–20 gradýsqa deıin tómendeıdi. Kúndiz 0…–5 gradýstan –7…–12 gradýsqa deıin salqyndaıdy. Onkúndiktiń sońyna qaraı aıaz kúsheıýi múmkin, túnde –20…–25 gradýs, al kúndiz –13…–18 gradýs bolady dep boljanyp otyr.

Ekinshi onkúndiktiń basynda aýa temperatýrasy qubylmaly bolady. Túnde –15…–20 gradýstan –5…–10 gradýsqa deıin, kúndiz 0…–5 gradýstan –10…–15 gradýsqa deıin aýytqýy múmkin.

Aıdyń úshinshi onkúndiginde túngi aýa temperatýrasy –14…–19 gradýstan –8…–13 gradýsqa deıin, al kúndiz –6…–11 gradýstan 0…–5 gradýsqa deıin ózgeredi.

Aılyq jaýyn-shashyn mólsheri klımattyq norma - 11–21 mm shamasynda bolmaq, keı jerlerde normadan kóp túsýi yqtımal. Aı boıy ekpini 15–20 m/s deıingi qatty jel jıi soǵyp, qar jaýýy, keı kúnderi boran bolýy múmkin. Sondaı-aq aı ishinde tuman túsýi yqtımal.

Buǵan deıin Qazaqstannyń barlyq óńiri boıynsha aýa raıyna baılanysty eskertý jarııalanǵanyn jazǵan edik.