SQO-da aqpan aıynda 53 oqýshy koronavırýs juqtyrǵan
PETROPAVL. QazAqparat – Soltústik Qazaqstan oblysynda aqpan aıynda mektepterdiń 53 oqýshysy koronavırýs juqtyrsa, jyl basynan qaýipti ınfektsııa joǵary oqý ornynyń 3 stýdentinde anyqtaldy, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti basshysy Áset Jumataevtyń aıtýynsha, qyrkúıek aıynan – jańa oqý jyly bastalǵaly óńirde mektep oqýshylary arasynda koronavırýs juqtyrýdyń 531 jaǵdaıy tirkelgen. Onyń 289-ynda balalar shtattyq rejımde oqysa, 244 oqýshy qashyqtan bilim alyp júrip juqtyrǵan.
«Aqpan aıynda 53 mektep oqýshysynda KVI anyqtaldy. Olardyń basym bóligi – 42 jaǵdaıda balalar mektepte bilim alǵan. Aýyrǵandardyń 11-i qashyqtan oqyǵan.
Al qańtar aıynan bastap osy kúnge deıin M.Qozybaev atyndaǵy Soltústik Qazaqstan ýnıversıtetiniń 3 stýdentinde koronavırýs tabyldy. Jastardyń ekeýi qashyqtan, bireý shtattyq rejımde oqyǵan. Onyń grýppalastary osy jaǵdaıdan keıin qashyqtan oqýǵa jiberildi», - deıdi Áset Jumataev.
Departament basshysynyń aıtýynsha, qazir óńirde 4 mektep karantınge jabylǵan. Esil aýdanyndaǵy Zagradovka orta mektebi, Qyzyljar aýdanyndaǵy Ozernyı, Sokolov jáne Ǵ.Músirepov aýdanyndaǵy Tselınnyı orta mektepteriniń oqýshylary qashyqtan oqýǵa jiberildi.
Buǵan deıin 13 aqpannan bastap SQO-da karantın talaptarynyń jeńildetiletinin aıtqan edik.
