SQO-da ákimshilik zańnamany buzǵan úsh ákimge tártiptik shara qoldanyldy
ASTANA. KAZINFORM — Soltústik Qazaqstan oblysynyń mamandandyrylǵan aýdanaralyq ákimshilik soty jer daýlary jáne memlekettik satyp alý nátıjelerin daýlaý boıynsha ákimshilik isterdi qaraý kezinde anyqtalǵan ÁRPK normalaryn buzý faktileri boıynsha oblys ákiminiń atyna úsh jeke uıǵarym shyǵardy.
Jeke uıǵarymdar zańdy kúshine endi.
— Birinshi jaǵdaıda, jol boıyndaǵy dámhana qurylysynyń jobasyn bekitýden bas tartýdy zańsyz dep taný týraly talap aryz boıynsha jeke uıǵarym shyǵarýǵa aýdan ákiminiń jazbasha aryzyn qaramaýy sebep bolǵan. Aýdan ákimi qurylys bóliminiń áreketine kelip túsken shaǵymdy qaraýdyń ornyna sol áreketine shaǵym jasalyp jatqan organnyń qaraýyna jibergen. Aýdan ákiminiń bul áreketteri tómen turǵan memlekettik organdardyń sheshimderine shaǵymdy joǵary turǵan organnyń qaraýy úshin ÁRPK talaptaryn buzǵan, — delingen sot habarlamasynda.
Ekinshi jaǵdaıda, jeke kásipkerdiń avtomobıl joldaryn paıdalaný jónindegi memlekettik satyp alýdyń qorytyndysyn daýlaý týraly talap qoıýynda aýdandyq turǵyn úı-kommýnaldyq sharýashylyq bólimi joq aýdıtorlyq sheshimdi negizge ala otyryp, talap qoıýshy jeńimpaz dep tanylǵan memlekettik satyp alýdyń kúshin joıǵany sottaǵy is materıaldarynan anyqtaldy.
— Turǵyn úı-kommýnaldyq sharýashylyq bólimi tarapynan jiberilgen óreskel zań buzýǵa jáne onyń zańsyz áreketin TÚKSh bóliminiń sotta moıyndaýyna, aýdıt bóliminiń jaýapkerdiń is-áreketiniń zańsyzdyǵy týraly hattaryna qaramastan, aýdan ákimi óz bólimshesiniń zańsyz áreketterin qamtıtyn jazbasha dáleldi ustanymyn sotqa usyndy. Sotqa joldanǵan jazbasha dáleldi ustanymynda aýdan ákimi talap aryzdy qanaǵattandyrýdan bas tartýdy surady, — delingen habarlamada.
Úshinshi jaǵdaıda, sharýa qojalyǵynyń talap aryzy negizinde sot «sharýa qojalyǵyna jer ýchaskesin ýaqytsha, óteýli, uzaq merzimdi ortaq úlestik jer paıdalaný (jaldaý) quqyǵyn berý týraly» ákimdik qaýlysyn zańsyz dep tanydy.
Sot isti qaraý kezinde aýdan ákimdiginiń jer zańnamasynyń normalaryn jáne ÁRPK normalaryn buzǵandyǵy anyqtaldy, bul jeke uıǵarym shyǵarýǵa negiz boldy.
Aldymen, mundaı sharalar laýazymdy tulǵalardyń ÁRPK normalaryn qatań saqtaýǵa yntalandyrýǵa baǵyttalǵan.
Aıta ketelik Petropavl turǵyny sot arqyly turǵyn úı baǵdarlamasyna qatysýǵa qol jetkizgen edi.