SQO-da ákimdik jalǵyzilikti anaǵa kúrdeli jóndeýdi qajet etetin baspana bergen
PETROPAVL. KAZINFORM – Soltústik Qazaqstan oblysy Tımırıazev eldi mekeniniń turǵyny jergilikti ákimdiktiń kommýnaldyq turǵyn úı qorynan bergen baspanasyna kóńili tolmaıdy. Jalǵyzilikti ananyń aıtýynsha, ol páterde turý múmkin emes.
Vıoletta esimdi kelinshek baǵdarlama boıynsha alǵan páteriniń fotolaryn áleýmettik jelide jarııalady. Baspanaǵa kúrdeli jóndeý qajet. Terezesi men qabyrǵalary ǵana bar. Qalǵanyn bárin aýystyrý kerek.
«Ylǵaldan páterdiń edeni shirip ketken. Qabyrǵalaryn kók basqan. Qazir qys ýaqytynda bul úıde turý múmkin emes. Jylytý júıesi durys istemeıdi, elektr jylytqyshtardy kúni-túni jaǵý kerek, saldarynan elektr qýaty úshin úlken tólem shyǵady. Aýdandyq turǵyn úı-kommýnaldyq sharýashylyq bóliminen kómek surap apta saıyn bardym, alaıda olar shara qoldanar emes», - deıdi jalǵyzilikti ana.
Tımırıazev aýdandyq sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi osy máselege qatysty jaýap berdi.
«Páterde eden jabynyn aýystyrý boıynsha aǵymdaǵy jóndeý júrgizildi. Kommýnaldyq turǵyn úı qorynan páter alýǵa kezekte turǵandarǵa tańdaý úshin qolda bar baspanalar aldyn ala kórsetiledi, kezekte turǵandardyń kelisiminen keıin turǵyn úı beriledi. Osy páterdi berý kezinde Sizge páterde aǵymdaǵy jóndeý jumysyn ózińiz júrgizetindigińiz aıtylyp, kelisildi. Turǵyn úı-kommýnaldyq sharýashylyǵy bólimine júgingenińizde sizge tańdaý úshin qol jetimdi nusqalar kórsetildi. Siz bul páterdi ózińiz tańdadyńyz. Sondaı-aq, siz jarııalaǵan fotosýretter edendi bólshekteý jumystary bastalǵan kezde túsirilgen», - delingen jaýapta.
Buǵan deıin Petropavlda múgedektigi bar adamdardyń bı úıirmesi jabylyp qalǵanyn jazǵan edik.
