SQO-da ákimshilik jazaǵa tartylǵan 37 jumys berýshi 6 mln-nan astam teńge aıyppul tóledi
SQO Memlekettik eńbek ınspektsııasynyń málimetinshe, 37 kásiporyndy tekserý barysynda eńbekaqy boıynsha qaryzdyń 702,3 mln teńgege jetkeni anyqtalǵan. Búginde 6 myńǵa jýyq jumysshy 650 mln teńge shamasynda jalaqysyn aldy. Al qaryzdyń ósýine jol bergen jumys berýshiler ákimshilik jaýapqa tartyldy.
«SQO-da eńbekaqyny bermeý, zeınetaqy jáne áleýmettik tólemderdi ýaqytynda aýdarmaý boıynsha birqatar máseleler bar. Bizdegi jáne qala men aýdandar bergen málimet boıynsha qazir 7 kásiporynnyń 461 qyzmetkeri aldyndaǵy qaryzy 95 mln teńgege jetken. Onyń 57,6 mln teńgesi Petropavl qalasyna tıesili», - deıdi SQO Memlekettik eńbek ınspektsııasy basqarmasynyń jetekshisi Qaırat Pishenbaev.
Mamandardyń aıtýynsha, «Kazgradstroı NS» JShS-i ǵana óz jumysshylaryna 53,6 mln teńge qaryz. 2662 tóleýshi zeınetaqy qoryna 467,2 mln teńge aýdarym jasaýy kerek. Mindetti áleýmettik tólemder boıynsha 1904 kásiporynnyń bereshegi 230,8 mln teńgege jetken.
«Bul máseleler azamattardyń kóńil-kúıine keri áser etip, áleýmettik jaǵdaıdyń shıelenisýine ákeledi. Halyqtyń eńbek quqyqtarynyń saqtalýy bizdiń únemi baqylaýymyzda», - deıdi memlekettik ınspektorlar.
