SQO-da ákesin urǵan 22 jastaǵy jigit qamaýǵa alyndy

Oqıǵa Shal aqyn aýdany Birlik aýylynda bolǵan. Ákesine qol jumsap, balaǵattap jatqan beınejazbany jigittiń ózi áleýmettik jelige júktegen. Kópshilikke belgili bolǵan bul fakti boıynsha tártip saqshylary jedel áreket etip, tekserý jumystaryn júrgizdi.

Polıtsııa qyzmetkerleri bul janjaldyń turmystyq sebepterge baılanysty týyndaǵanyn anyqtaǵan. Jigitke qatysty Qazaqstan Respýblıkasy Ákimshilik quqyq buzýshylyq týraly kodeksiniń 73-babynyń 1-bóligi — «Otbasy-turmystyq qatynastar salasyndaǵy quqyqqa qarsy áreketter» boıynsha ákimshilik materıaldar rásimdeldi.

Zeınetker sot-medıtsınalyq saraptamadan ótýden bas tartty, ulyna qatysty eshqandaı shaǵymy joq ekenin aıtyp, polıtsııaǵa aryz jazýdan bas tartty.

Sot sheshimimen jas jigit búgin 5 táýlikke ákimshilik qamaýǵa alyndy.

Polıtsııa departamenti otbasy-turmystyq zorlyq-zombylyqtyń jáne týystaryna qatysty kez kelgen quqyqqa qarsy áreketter úshin zańǵa sáıkes jaýapkershilik bar ekenin eskertedi. Osyndaı jaǵdaılardyń kýási bolǵan jaǵdaıda, bul týraly dereý polıtsııaǵa habarlaý qajet.

Buǵan deıin Mańǵystaý oblysynyń Jetibaı aýylyndaǵy balabaqshada tárbıelenýshi keńse pyshaǵynan jaraqat alǵanyn jazǵan edik.