SQO-da aktsııa aıasynda mýzeı ǵımaraty qyzyl túspen jaryqtandyrylmaq

PETROPAVL. QazAqparat – Soltústik Qazaqstan oblysy týberkýlezge qarsy halyqaralyq aktsııaǵa qatysyp, tarıhı-ólketaný ǵımaraty bir saǵatqa qyzyl túspen jaryqtandyrylmaq, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, 24 aqpannan respýblıkada týberkýlezge qarsy aılyq ótip jatyr. Bul is-shara 24 naýryzda atap ótiletin «Búkilálemdik týberkýlezge qarsy kúres kúnine» oraılastyrylǵan. Halyqtyń sanıtarlyq-epıdemıologııalyq jaǵdaıyn jaqsartýdy maqsat etken aılyq bıyl «Biz týberkýlezdi jeńe alamyz!» uranymen ótip jatyr.

Oblysta qaýipti aýrýdyń aldyn alý maqsatynda birqatar is-shara josparlanǵan. Sonyń biri – 11 jáne 18 naýryzda ótetin ashyq esik kúni. Turǵyndar SQO ftızıopýlmonologııa ortalyǵynyń konsýltatıvti-dıagnostıka bóliminde flıýrografııalyq zertteýden ótip, ftızıatr-dárigerdiń keńesin ala alady. Sondaı-aq bul kúnderi analızder tapsyrýǵa da múmkindik bar.

Sońǵy jeti jyldan beri Búkilálemdik densaýlyq saqtaý uıymynyń bastamasymen 24 naýryzda «Álemdi týberkýlezden jaryqtandyr» atty halyqaralyq kampanııa uıymdastyrylyp keledi. Aktsııa barysynda qalalardaǵy kórneki ǵımarattar qyzyl túspen jaryqtandyrylady. Maqsat – týberkýlezben kúreske shaqyrý, qaýipti dertke jurtshylyqtyń nazaryn aýdarý.

Petropavl halyqaralyq aktsııaǵa 2000 jyly alǵash ret qatysty. Sodan beri Abylaı han rezıdentsııasy mýzeı-kesheni, oblystyq beıneleý óneri mýzeıi, astrofızıkalyq observatorııa, M.Qozybaev atyndaǵy Soltústik Qazaqstan ýnıversıteti qyzyl túspen jaryqtandyryldy.

Bıyl 24 naýryzda SQO tarıhı-ólketaný mýzeıi aktsııaǵa qatysady. Turǵyndar saǵat 20.00 men 21.00 aralyǵynda ǵımarattyń qyzyl túspen jaryqtandyrylǵanyn kóre alady.