SQO-da AITV juqtyrǵandardyń 90%-y antıretrovırýstyq terapııa qabyldaıdy
PETROPAVL. KAZINFORM — Soltústik Qazaqstan oblysynda qazirgi ýaqytta adamnyń ımmýn tapshylyǵy vırýsyn juqtyrǵan 1400 syrqat esepke alynǵan.
Oblystyq AITV ınfektsııasynyń profılaktıkasy jónindegi ortalyq dırektory Mamadııar Baıǵulovtyń aıtýynsha, ótken jylmen salystyrǵanda antıretrovırýstyq terapııany alatyndar sany taǵy 3% ósti. Turaqty em syrqattardyń ómir súrý sapasy men uzaqtyǵyn jaqsartyp qana qoımaıdy, sonymen qatar vırýstyń taralýyna jol bermeıdi.
— Antıretrovırýstyq terapııa — bul organızmdegi vırýsty basýǵa jáne ımmýndyq júıeni qalpyna keltirýge baǵyttalǵan em. AITV juqtyrǵandar ony ómir boıy alyp, preparattardy kúndelikti qabyldaýy kerek. Nátıjesinde densaýlyqty, eńbekke qabilettilikti saqtap, ómirge deni saý balany ákelý múmkindigi bar. Sonymen qatar AITV-nyń taralýyn tómendetýde bul em mańyzdy ról atqarady: adam aǵzasyndaǵy vırýstyq júkteme az bolǵan kezde vırýstyń basqa adamdarǵa berilý qaýpi is júzinde joıylady, — deıdi Mamadııar Baıǵulov.
Sol sebepti mamandar AITV-nyń aldyn alý boıynsha ǵana emes, qaýipti vırýsty juqtyrǵandardy antıretrovırýstyq terapııamen barynsha qamtý boıynsha da jumysty qolǵa alǵan.
— 1 jeltoqsanda búkil álemde JITS-pen kúres kúni atap ótiledi. Osyǵan oraı 10 jeltoqsanǵa deıin búkilálemdik JITS-ke qarsy kúres naýqany ótip jatyr. Bıyl ol «Qıyndyqtardan AITV-ǵa qarsy is-qımylǵa» degen ataýmen uıymdastyrylǵan. Іs-sharanyń maqsaty — qol jetkizgen jetistikti saqtaý jáne AITV-ǵa qarsy tıimdi sharalardy damytýǵa baǵyttalǵan elder men qaýymdastyqtardyń kúsh-jigeriniń mańyzdylyǵyn atap kórsetý, — deıdi Mamadııar Baıǵulov.
Buǵan deıin SQO-da AITV juqtyrǵan analar 44 balany dúnıege ákelgenin jazǵan edik.