SQO-da AITV juqtyrǵan analar 44 balany dúnıege ákeldi
PETROPAVL. KAZINFORM — Adamnyń ımmýn tapshylyǵy vırýsymen ómir súretin áıelder úshin ana bolý arman ǵana emes, shynaıy múmkindikke aınaldy. Zamanaýı medıtsınanyń jetistikteri men dárigerlerdiń kásibı baqylaýy arqasynda deni saý balanyń dúnıege kelý yqtımaldyǵy 99% deıin artyp otyr.
Soltústik Qazaqstan oblystyq AITV ınfektsııasynyń profılaktıkasy jónindegi ortalyq dırektorynyń mindetin atqarýshy Aıman Syzdyqova AITV-nyń anadan balaǵa berilý joldary men onyń aldyn alý sharalary týraly aıtyp berdi.
— Aıman Keńesqyzy, AITV aýyratyn áıel júkti bolyp, deni saý bala týa ala ma?
— Bul dert ana bolýǵa kedergi emes. Qazirgi ýaqytta júktilik AITV-ınfektsııasynyń damýyn nasharlatady nemese jedeldetedi degen derekter joq. Sonymen qatar, AITV ınfektsııasy júktiliktiń qalypty ótýine jáne uryqtyń damýyna áser etpeıdi. Negizgi qaýip — vırýstyń balaǵa berilýi. Alaıda, dárigerlerdiń baqylaýymen jáne durys terapııamen AITV-men aýyratyn áıelderdiń deni saý bala týýǵa barlyq múmkindigi bar.
— Vırýs anadan balaǵa qalaı berilýi múmkin?
— Infektsııa júktilik kezinde de, bosaný kezinde de nemese emshek sútimen emizý kezinde de balaǵa berilýi múmkin, óıtkeni emshek sútinde de vırýs bar.
— Juqtyrý qaýpin qalaı azaıtýǵa bolady?
— Antıretrovırýstyq terapııany (ART) qabyldaý mańyzdy ról atqarady. Onsyz ınfektsııanyń taralý yqtımaldyǵy 50% jetedi. Dári-dármekterdi únemi qabyldaǵan kezde qaýip aıtarlyqtaı tómendeıdi, deni saý balanyń týýy 99% quraıdy. Klınıkalyq zertteýler júktilik kezinde antıretrovırýstyq preparattardyń qaýipsizdigin dáleldedi — olar balanyń ósýi men damýyna áser etpeıdi jáne júktiliktiń qalypty ótýine qaýip tóndirmeıdi. Naqty emdeý rejımin árdaıym dáriger ananyń densaýlyq jaǵdaıynyń basqa erekshelikterin eskere otyryp tańdaıdy.
Eger syrqatta anyqtalmaıtyn vırýstyq júktemege qol jetkizilse, áıel tabıǵı túrde bosanýy múmkin. Eger bul nátıjege qol jetkizý múmkin bolmasa nemese ART múldem jasalmasa, eń durysy — kesar tiligi arqyly bosandyrý. Bul jaǵdaıda náreste bosaný kanalynan ótpeıdi jáne ananyń qanymen baılanysqa túspeıdi, bul ınfektsııa qaýpin aıtarlyqtaı tómendetedi.
Bala týǵannan keıin birneshe aı boıy vırýstyń bar-joǵyn bilý úshin tekseriske únemi qan alynady. Derti bar áıel emizýden bas tartyp, jasandy qospalarǵa aýysý da mańyzdy qorǵanys faktory bolyp esepteledi.
Sonymen qatar, AITV mártebesi bar analardan týǵan barlyq balalarǵa birneshe apta boıy ART preparattary profılaktıkalyq maqsatta taǵaıyndalady.
— Óńirde AITV derti bar analardan qansha bala ómirge keldi?
— Sońǵy tórt jylda bizdiń oblysta 44 bala dúnıege keldi, AITV juqtyrý jaǵdaıy tirkelgen joq.
— Jalpy óńirdegi AITV-ge qatysty epıdemıologııalyq jaǵdaı qandaı?
— Qazir óńirde AITV-men ómir súretin 1400-den astam adam esepte tur. Osy jyldyń 8 aıynda AITV juqtyrýdyń jańa 72 jaǵdaıy anyqtaldy, bul 2024 jyldyń sáıkes kezeńinen 14,3% az.
AITV-ınfektsııasyn juqtyrǵandardyń jas sanatyna toqtalsaq: 30-39 jastaǵylardyń 27,8%, 40-49 jastaǵylardyń 33,3% jáne 50-59 jas aralyǵyndaǵylardyń 23,6%); jynysy boıynsha 59,7% — erler, 40,3% — áıelder.
AITV-ny eki jolmen juqtyrǵan: parenteraldy, ıaǵnı qan arqyly psıhoaktıvti zattardy ınektsııalyq jolmen berýden -13,9% jáne qalǵanyna ınfektsııa jynystyq jolmen berilgen.
– AITV taldaýdy óńirde qaıda jasatýǵa bolady?
— AITV testileý turǵylyqty jeri boıynsha emhanalarda jáne oblystyq AITV ınfektsııasynyń profılaktıkasy jónindegi ortalyǵynda júrgiziledi. Taldaý tegin jáne qupııa túrde jasalady.
Budan bólek baılanys ortalyǵynyń senim telefonyna 8 (7152) 47-57-37 nómiri arqyly habarlasýǵa bolady.
Buǵan deıin elıtalyq AITV kontrollerleri degen kimder ekenin jazǵan edik.