SQO-da aǵash sheberi qarapaıym bórene-butaqtan óner týyndysyn jasaıdy
PETROPAVL. KAZINFORM — Soltústik Qazaqstan oblysy Nıkolaevka aýylynda turatyn ıÝrıı Ivanov aǵash oıý ónerimen ómir boıy aınalysyp keledi.
Onyń qolynan shyqqan dúnıeler erekshe oryndaý mánerimen kóz tartady. Sheber ár bólshekti muqııat oıyp, tabıǵı úılesimin saqtap, usaq-túıekke deıin mán beredi. Sodan da bolar onyń qolynan shyqqan buıymdar shynaıy kórinedi. Bir týyndysynda aǵash qýystan syǵalap turǵan tıindi kórseńiz, endi birinde azýyn aqsıtqan aıý beınelengen.
Bıyl zeınet demalysyna shyqqan aýyl turǵyny úshin shyǵarmashylyq — jaı ǵana hobbı emes, ómiriniń ajyramas bóligine aınalǵan.
ıÝrıı Ivanovtyń ónerge qyzyǵýshylyǵy bala kezinen bastalǵan eken. Ol kishkentaıynan sýret salýdy jaqsy kórip, ermeksazdan túrli músinder jasaǵan. Mektepte oqyp júrgende-aq aǵash oıýǵa den qoıyp, osy ónerdiń qyr-syryn ózdiginen meńgere bastaıdy.
Keıin Chelıabi qalasynda sýretshi-bezendirýshi mamandyǵyn meńgerip, týǵan aýylyna oralady.
Sheber qarapaıym bóreneniń nemese butaqtyń boıynan ózgeler baıqamaıtyn erekshe pishin men bolashaq týyndyny kóre alady. Ásirese tal, jóke jáne qaraǵashpen jumys istegendi unatady.
— Maǵan kóbine talmen jumys istegen unaıdy. Aldymen jasaıtyn zatym oıǵa keledi. Keıin eskızin jasap, ony aǵashqa kóshiremin. Qansha ýaqyt ketetinin aıta almaımyn. Qolyma saımandarymdy alǵan kezde barlyq dúnıeni umytyp ketemin. Ýaqyt mańyzdy emes, óıtkeni men ony satý úshin jasamaımyn, — deıdi ol.
ıÝrıı Ivanov úshin sheberhanasy — shabyt mekeni. Munda ol ýaqyttyń qalaı ótkenin de baıqamaı qalady. Aǵashtyń tabıǵı bederi nemese butaqtyń erekshe pishini jańa týyndynyń negizine aınalady.
Sheberdiń qolynan shyqqan buıymdardyń qatarynda aǵash shamdar, erekshe pishindegi vazalar, sándik músinsheler, kartınalar, túrli kádesyılar, aǵash ydystar men as úıge arnalǵan turmystyq zattar bar. Barlyǵy da jóke, tal, qaraǵash, shaǵan sekildi aǵash túrlerinen jasalǵan.
— Jasaǵan buıymdardy kóbine baýyrlaryma, týǵan-týystaryma beremin. Tapsyrys berýshiler bar, biraq almaımyn. Óıtkeni qolym júrmeı qalady. Ondaıda jumys aıaqtalmaı qalýy múmkin. Kóbine astaý jasap berýimdi suraıdy, — deıdi ıÝrıı Ivanov.
Sheberdiń pikirinshe, aǵash oıý ónerin tolyq meńgerý úshin ómir boıy úırený kerek. Bul iste tabıǵı ıkemmen qatar sýret salý qabileti men proportsııany sezine bilý de mańyzdy.
Buǵan deıin atyraýlyq qolóner sheberi Nursultan Qalıev ulttyq aspap jasaý ónerine jańashyldyq engizip, qobyzdyń shanaǵyn balyq terisinen jasap shyqqanyn jazǵan edik.
