SQO-da ádep saqtamaǵan aýdan, aýyl ákimderi tártiptik jazaǵa tartyldy
PETROPAVL. KAZINFORM — Soltústik Qazaqstan oblysynda bıyl memlekettik qyzmet salasynda 450-den astam zań buzýshylyq tirkeldi.
QR Memlekettik qyzmet isteri agenttiginiń SQO boıynsha departamentiniń málimetinshe, bıyl óńirde vedomstvo 26 tekserý júrgizgen, onyń tek beseýi ǵana josparly bolǵan.
— Memlekettik baqylaý tek zań buzýshylyqtardy anyqtap, kináli tulǵalardy jaýapkershilikke tartýmen shektelmeıdi. Baqylaý jumysynyń basty maqsaty — quqyqty qalpyna keltirý jáne zań buzýshylyqqa ákelgen sebepterdi joıý.
Tekseristerdiń nátıjesinen keıin 56 ótinish berýshiniń buzylǵan quqyqtary qalpyna keltirildi, — deıdi QR Memlekettik qyzmet isteri agenttiginiń SQO boıynsha departamenti basshysynyń orynbasary Baqyt Mahatov.
Jospardan tys tekserýlerdiń basym bóligi azamattar men memlekettik qyzmetshilerdiń ótinishteri negizinde júrgizilgen. Máselen, oblystaǵy memlekettik organdardyń birinde memlekettik qyzmetshige tıesili syıaqy zańsyz tólenbegen. Departament tekseris júrgizip, memlekettik qyzmetshiniń buzylǵan quqyǵy qalpyna keltirildi. Oǵan tıesili syıaqy tolyq kólemde tólendi.
— Árbir tekserýdiń jáne anyqtalǵan árbir zań buzýshylyqtyń artynda naqty jaǵdaılar men adamdardyń taǵdyry tur. Sondyqtan olardyń árqaısysyna quqyqtyq baǵa berilip, tıisti sharalar qabyldanady.
Tekserýler memlekettik qyzmetshilerdiń qyzmettik ádep normalaryn buzý jaǵdaılary da kezdesetinin kórsetti. Talap bárine ortaq, memlekettik organ basshylaryna da, basqa memlekettik qyzmetshilerge de birdeı qoıylady, — deıdi Baqyt Mahatov.
Mamannyń aıtýynsha, oblystyq bir basqarma basshysynyń orynbasary azamatpen qarym-qatynas barysynda teris áreketke jol bergen. Taǵy bir jaǵdaıda memlekettik organnyń basshysy muǵalimmen sóılesý kezinde ádep normalaryn saqtamaǵan.
Júrgizilgen tekserýler barysynda bul faktiler rastaldy. Memlekettik qyzmetshilerge tıisti tártiptik jaýapkershilik sharalary qoldanyldy.
Taǵy bir tekserý barysynda aýdannyń aýyldyq okrýgi ákimi turǵyndarmen ótken jıyn kezinde dóreki sóılegen. Ol da tártiptik jaýapkershilikke tartyldy.
— Oblys ákimi orynbasarynyń qabyldaýynda azamattyń ótinishi talqylanǵan kezde aýdan ákimi ótinish berýshige qatysty shyndyqqa sáıkes kelmeıtin málimetter taratqan. Tekserý materıaldary Ádep jónindegi komıssııada qaraldy. Aýdan ákimine tártiptik jaza qoldanyldy.
Joǵary laýazymdy memlekettik qyzmetshi de zań talaptaryn jáne qyzmettik ádep normalaryn qatań saqtaýy tıis, — deıdi Baqyt Mahatov.
Buǵan deıin memlekettik qyzmetshiler qandaı zań buzýshylyqtarǵa jıi jol beretinin jazǵan edik.
