SQO-da adasyp ketken 5 jasar balany polıtseıler úıine qaıtardy
PETROPAVL. QazAqparat - Soltústik Qazaqstan oblysy Taıynsha eldimekeninde adasyp ketken 5 jasar balany polıtseıler ata-anasyna tabystady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, jylaǵan búldirshindi polıtsııa patrýli Taıynsha eldimekeniniń aınalma jolynda baıqap qalǵan. Bala ózin Vladıkpin dep tanystyrypty. Aıtýynsha, qydyrýǵa shyǵyp, adasyp ketken.
Patrýldi polıtsııa batalonynyń qyzmetkerleri kezekshi bólimge habarlasyp, adasqan búldirshindi ýchaskelik ınspektorǵa tapsyrdy. Kólikke otyrǵyzyp, Taıynsha kóshelerin aralaý barysynda bala óz úıine aparar joldy kórsetti. Vladık ózin izdeı bastaǵan áke-sheshesimen aman-esen qaýyshty.
«Mundaı jaǵdaılar anda-sanda bolyp turady. Sol sebepti ata-analardy kishkentaı balalaryna muqııat qaraý qajettigin taǵy bir márte eskertkim keledi. Al ınspektor adasyp ketken búldirshinniń anasymen profılaktıkalyq áńgime júrgizdi», - deıdi Taıynsha aýdandyq polıtsııa bóliminiń bastyǵy Nurlyjan Aqtanov.
