SQO-da adasyp ketken 5 jasar bala úıinen 10 shaqyrym jerden tabyldy
PETROPAVL. QazAqparat – Soltústik Qazaqstan oblysynda balalarmen oınaýǵa ketken 5 jasar bala adasyp ketip, úıinen 10 shaqyrymdaı jerden aman tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, keshki saǵat 20.00 shamasynda traktorymen úıine qaıtyp kele jatqan Qyzyljar aýdany Znamenskoe aýylynyń turǵyny Andreı Mehov dala jolynda júrgen balaqaıdy baıqaıdy.
«Búldirshin qatty qorqyp qalǵan eken. Qaıdan kele jatqanyn, qaıda turatynyn – eshteńe aıtyp túsindire almady. Tek esimin ǵana aıtty. Traktorǵa otyrǵyzyp, úıge ákeldim. Mán-jaıdy aıtyp, ýchaskelik polıtsııa ınspektoryna habar berdim», - deıdi aýyl turǵyny.
Polıtsııa kapıtany Serik Joltanov tabylǵan bala týraly aqparatty jaqyn mańdaǵy aýyldarǵa joldaıdy. Áńgime barysynda bala anasynyń esimin atap, bul polıtseılerge onyń jaqyndaryn anyqtaýǵa kómektesti.
Balanyń Aqqaıyń aýdany Toqshyn aýylynda turatyny anyqtaldy. Qarańǵy túse bastaǵan kezde alańdaǵan anasy ulyn izdeýge shyqqan. Alaıda, uzaq izdeýge týra kelgen joq, ýchaskelik ınspektor oǵan qýanyshty habardy jetkizdi.
«Búldirshin kúndiz balalarmen oınaýǵa ketken. Balalardyń birimen dalaǵa baryp, oǵan ilese almaı qalyp qoıǵan. Adasyp ketken balaqaı júre bergen. Ol turǵylyqty mekenjaıynan 10 shaqyrymdaı jerden tabylyp, anasyna aman-esen tabys etildi. Balanyń áke-sheshesimen profılaktıkalyq áńgime júrgizildi. Qazir jazda balalar úlkenderdiń qaraýynsyz kóp ýaqytyn dalada ótkizedi. Ata-analardan óz balalaryn nazardan tys qaldyrmaýdy suraımyz», – deıdi Qyzyljar aýdany PB bastyǵynyń mindetin atqarýshy Jánibek Muhamadıev.
