SQO-da adamdy qaǵyp, óltirip alǵan kólik júrgizýshisi eki jylǵa sottaldy

PETROPAVL. KAZINFORM — Soltústik Qazaqstan oblysy Taıynsha aýdanynda bolǵan jol-kólik oqıǵasyna kináli er adamǵa sot úkimi shyqty.

Sot otyrysyna kólik júrgizýshileri jáne kólik quraldaryn basqarý quqyǵynan aıyrylǵandar arnaıy shaqyryldy. 

SQO Taıynsha aýdany prokýratýrasynyń málimetinshe, oqıǵa byltyr 30 qyrkúıekte «Astana — Petropavl» avtojolynyń 393-shaqyrymynda, Roşınskoe aýylynyń mańynda bolǵan. Kólik júrgizýshisi jol qozǵalysy erejeleriniń talaptaryn óreskel buzǵan. Saldarynan jaıaý júrginshini qaǵyp ketip, oqıǵa ornynan qashyp ketken.
Al jábirlenýshi keıin medıtsınalyq mekemede qaıtys boldy.

Taıynsha aýdandyq sotynyń úkimimen er adam Qazaqstan Respýblıkasy Qylmystyq kodeksiniń 345-babynyń 3-bóligi jáne 347-baby boıynsha kináli dep tanyldy. Sot ony 2 jyl merzimge bas bostandyǵynan aıyryp, sondaı-aq qosymsha 3 jyl merzimge kólik quraldaryn basqarýǵa tyıym saldy.

Úkim zańdy kúshine engen joq.

Buǵan deıin esirtki taratý jáne kontrabandamen aınalysqan qaraǵandylyq sottalǵanyn jazǵan edik.