SQO-da adam papıllomasy vırýsyna qarsy 1,1 myń qyzǵa vaktsına egildi

PETROPAVL. KAZINFORM – Soltústik Qazaqstan oblysynda 568 áıel jatyr moıny qaterli isigimen dıspanserlik esepte tur. Obyrdyń aldyn alýǵa bolady. Adam papıllomasy vırýsyna qarsy ekpe júrgizetin elderde, mamandardyń aıtýynsha, raktyń osy túrinen bolatyn ólim-jitim jáne syrqattanýshylyq 90% kemigen. SQO sanıtarııalyq-epıdemıologııalyq baqylaý departamentiniń  basshysy Áset Jumataevtyń aıtýynsha, Qazaqstanda áıelder arasyndaǵy onkologııalyq aýrýlar arasynda jatyr moıny obyry sút bezi obyrynan keıin ekinshi orynda tur. 

«Qazaqstanda kún saıyn jatyr moıny obyrynyń 5 jańa jaǵdaıy tirkeledi, eki áıel kún saıyn osy aýrýdan qaıtys bolady. Bizdiń oblysty alsaq, 2023 jyly jatyr moıny obyry dıagnozymen esepke jańadan 52 áıel, 2024 jyly 9 aıda 49 áıel alyndy. Qazirgi ýaqytta esepte 568 áıel tur. Jyl basynan beri 11 adam qaıtys boldy. Búgingi tańda adam papıllomasy vırýsynan em joq, aldyn alýdyń jalǵyz ádisi – vaktsınatsııa», - deıdi Áset Jumataev.

Adam papıllomasy vırýsy adamnyń aýyz qýysy men jynys músheleriniń terisi men shyryshty qabyǵyna áser etetin vırýstardyń 200-den astam túri. 

«Juqpaly aýrý turmystyq jolmen, jynystyq qatynas arqyly, tipti týý joldary arqyly ótý kezinde anadan balaǵa beriledi. Qyryný nemese epılıatsııa kezinde de adam papıllomasy vırýsy deneniń bir aımaǵynan ekinshisine aýysýy múmkin. Al vırýstyń onkogendik túrleri denede qalyp qoısa, bul ártúrli organdardyń qaterli isigine ákeledi. Eń aldymen - jatyr moıny obyryna», - deıdi departament basshysy. 

Mamannyń aıtýynsha, adam papıllomavırýsyna qarsy vaktsına áıelderdiń reprodýktıvti fýnktsııasyna áser etpeıdi jáne bedeýlikti týdyrmaıdy, bul álemniń damyǵan elderinde klınıkalyq zertteýlerden dáleldendi. 

Ázirge SQO boıynsha 1126 qyz, sonyń ishinde 11 jastaǵy - 491, 12-13 jastaǵy 635 qyz egildi.

Buǵan deıin SQO-da jyl basynan beri 260 adam skarlatına juqtyrǵanyn jazǵan edik.