SQO-da adam qaǵyp óltirgen júrgizýshi 3 kúnnen beri izdestirilýde
PETROPAVL. QazAqparat – Soltústik Qazaqstan oblysynyń polıtseıleri 18 jastaǵy jigitti kóligimen qaǵyp, mert qylǵan júrgizýshini úsh kúnnen beri izdestirýde, dep habarlaıdy QazAqparat tilshisi.
Jol apaty 7 maýsym kúni M.Jumabaev aýdany Polýdıno eldi mekeniniń mańynda túnde boldy.
SQO Polıtsııa departamenti baspasóz qyzmetiniń málimetinshe, Polýdıno eldi mekeniniń 2002 jyly týǵan turǵyny sol túni jol boıyndaǵy dámhanadan shyqqan. Kólik qaqqan ony ótip bara jatqan júrgizýshilerdiń biri jol shetinen taýyp alǵan. Jas jigit alǵan jaraqattardan aýdandyq ortalyq aýrýhanada kóz jumdy.
Bul derek Sotqa deıingi tergep-tekserýdiń biryńǵaı tizilimine engizildi. Birneshe tıisti saraptama taǵaıyndaldy. Qylmysty ashý maqsatynda oblys ortalyǵynan kelgen krımınalıster jumys istep jatyr. Sondaı-aq Jergilikti polıtsııa qyzmeti basqarmasynyń izdeý toby, aýdandyq polıtsııa bóliminiń qyzmetkerleri tolyq quramda jumyldyrylǵan. Jedel is-sharalar aıasynda kólik ıeleri tekserilip, beınekameralardyń jazbalary zerdelenip jatyr. Kýágerlerdi anyqtaý maqsatynda da jumystar qolǵa alynǵan.
«Qazir bizge jol apatyna kinálini anyqtaýǵa kómektesetin kez kelgen aqparat qundy. Eger aýyl nemese jaqyn mańdaǵy eldi meken turǵyndary nemese sol túni jol júrgen kólik júrgizýshileri qandaı da bir málimetti bilse, bizge habarlasýdy suraımyz. M.Jumabaev aýdandyq polıtsııa bólimine - 50 03 99 nómiri arqyly, SQO PD Jergilikti polıtsııa qyzmetiniń kezekshi bólimine - 61 25 01 jáne meniń 39 40 16 - jumys nómirime habarlasa alady», - deıdi SQO PD Krımınaldyq polıtsııa basqarmasynyń bastyǵy Petr Klımov.
Qylmystyń ashylýyn SQO PD jáne oblystyq prokýratýra basshylyǵy baqylaýǵa alǵan.
