SQO-da 99 jasqa kelgen maıdanger Vasılıı Makıenkoǵa qurmet kórsetildi
PETROPAVL. KAZINFORM – Óńirde kózi tiri úsh maıdanger qalsa, sonyń biri - Vasılıı Makıenko búgin 99 jasqa toldy.
Týǵan kúnine oraı ardager búgin quttyqtaýlardy qabyldap jatyr. Qonaqtardyń ishinde Petropavl ákimi Serik Muhamedıev te bar. Maıdangerge estelik syılyqtar tabystap, soǵys kezindegi jáne eldi soǵystan keıingi damytýdaǵy eren eńbegi úshin alǵys aıtty.
Vasılıı Makıenko turatyn úıdiń aýlasynda QR Ulttyq ulany akademııasynyń ókilderi jáne áskerı orkestr ardagerge qurmet kórsetti.
Vasılıı Vasılevıch 1926 jyly 24 qańtarda Soltústik Qazaqstan oblysy Voloshınka aýylynda dúnıege kelgen. 1943 jyly ol 17 jasynda Qazan aýdanynyń áskerı komıssarıaty arqyly maıdanǵa shaqyryldy. Ardagerdiń áskerı joly 44-shi atqyshtar polkinde bastalyp, keıin 142-shi atqyshtar jáne 317-shi gvardııalyq atqyshtar polkinde qyzmet etti.
– Bizdiń ásker Kenıgsbergke deıin jetti. 9 mamyr kúni kirdik. Keıin bizdiń áskerı bólimdi Belorýs jerine, Polotsk qalasyna jiberdi. 250 bas maldy aman-esen jetkizýimiz kerek boldy. Sol kezde Vıtebsk qalasynda desanttyq ásker jasaqtalyp jatqan bolatyn, men sonda barýǵa nıet bildirdim, - dep eske alady ol.
Vasılıı Makıenko soǵystan keıin bes jyl áýe-desanttyq áskerde bolyp, 75 ret parashıýtpen sekiredi. Eńbegi elenip, ІІ dárejeli Otan soǵysy ordenimen, sondaı-aq «Kenıgsbergti alǵany úshin» jáne «Germanııany jeńgeni úshin» jáne basqa da orden-medaldarmen marapattaldy.
Buǵan deıin elimizde Otan soǵysynyń 120 ardageri qalǵanyn jazǵan edik.