SQO-da 92 eldi mekendi sý basý qaýpi bar
PETROPAVL. QazAqparat - Soltústik Qazaqstan oblysynda sý tasqyny kezinde qaýip tónetin 92 eldi meken esepke alyndy, dep habarlaıdy QazAqparat tilshisi.
36 aýylda ózen sýynyń deńgeıi joǵary bolsa, 41-inde - qardyń erýi saldarynan jáne 15 eldi mekende - sý deńgeıiniń kóterilýi men kóldiń tolýy saldarynan sý tasqyny bolýy múmkin.
«Jergilikti atqarýshy organdar 84 eldi mekende 3 jyldyń ishinde 79,5 shaqyrym bóget quryp, 28 shaqyrym sý aıdaıtyn kanaldar qazdy. 18 eldi mekende ınjenerlik-tehnıkalyq is-sharalar júrgizý múmkin bolmady. Sebebi, olar ózen ańǵarlarynda, orman alabynda ornalasqan», - dedi oblys ákiminiń orynbasary Anton Fedıaev.
Qazir óńir sý tasqynyna daıyndalyp jatyr. Byltyr qazanda tótenshe jaǵdaılar departamentiniń qyzmetkerleri Esil, Aıyrtaý, Ǵabıt Músirepov jáne Shal aqyn aýdandarynyń aýmaǵynda sý tasqyny bolatyn eldi mekenderde tekserý júrgizdi.
Atap aıtqanda, Esil aýdanyndaǵy eldi mekenderge Úlken Torańǵul kóli qaýip tóndirip otyr. Kishi Torańǵuldyń sýy Úlken Torańǵulǵa quıylyp, sonyń saldarynan kóldegi sý deńgeıi 5 sm kóterilgen.
«Kishi Torańǵuldaǵy sý deńgeıin tómendetý úshin Qamysaqty ózenine deıin sý ótkizetin kanal qalpyna keltirildi. Novopokrovka aýylyna jaqyn jerde sýarmaly-sýlandyrý kanaly júıesinde dıametri 1 metr bolatyn qubyr ornatylyp, ol arqyly ótken jyldyń shildesinen bastap 5 mln tekshe metr sý jiberildi. Ózen deńgeıi 30 sm azaıdy», - dedi A. Fedıaev.
Kóktemgi sý tasqyny kezeńinde tótenshe jaǵdaıdy joıý úshin 708 tehnıka, 331 sý aıdaıtyn qurylǵy daıyn. Qutqarýshylar men polıtseılerden quralǵan top jasaqtalǵan.
Sondaı-aq, 724 mln teńge somasynda oblystyq rezerv quryldy.
Olesıa Jýkoven
