SQO-da 910 shaqyrym sý qubyryn salý jáne rekonstrýktsııalaý jumysy bastaldy
ASTANA. KAZINFORM — Sý resýrstary jáne ırrıgatsııa mınıstrligi Soltústik Qazaqstan oblysynda 910 shaqyrym sý qubyryn salý jáne rekonstrýktsııalaý jumysyn bastady.
Sý resýrstary jáne ırrıgatsııa mınıstrligi Soltústik Qazaqstan oblysynda toptyq sý qubyrlaryn salý jáne rekonstrýktsııalaý boıynsha aýqymdy jobany júzege asyryp jatyr. Jańadan salynatyn jáne qaıta jańǵyrtylatyn sý qubyrlarynyń jalpy uzyndyǵy 910 shaqyrym.
Bul jumystar 251 eldi mekendi sýmen qamtamasyz etý sapasyn arttyryp, 340 myńǵa jýyq turǵynnyń ómir súrý sapasyn jaqsartýǵa oń áser etedi.
«Baǵdarlama aıasynda Sokolov, Kókshetaý, Býlaev, Esil, Presnov toptyq sý qubyrlaryn qaıta jańartý men jańadan salýdy qamtıtyn on iri joba iske asyrylady. Bul jumystar Soltústik Qazaqstan oblysynda senimdi sý júıesin qurýǵa jáne aýyz sýdyń sapasyn arttyrýǵa baǵyttalyp otyr», - dedi Sý resýrstary jáne ırrıgatsııa vıtse-mınıstri Erbolat Ibraıhanov.
