SQO-da 91 jastaǵy keıýana túnde úıinen shyǵyp ketip, úsip kete jazdady
PETROPAVL. QazAqparat – Soltústik Qazaqstan oblysynda 91 jastaǵy umytshaqtyq aýrýymen aýyratyn keıýana úıinen túnde juqa kıimmen shyǵyp ketip, úsip kete jazdady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa M.Jumabaev aýdanynyń ortalyǵy Býlaev qalasynda boldy. Túngi kezekshilikte júrgen patrýldi polıtseılerge saǵat tańǵy 4.00 shamasynda eldimekendegi úılerdiń birine belgisiz keıýananyń esik qaqqany jaıynda habarlama túsedi.
Tártip saqshylary birden oqıǵa ornyna jetedi. Juqa kóılek pen jalań aıaqqa ile salǵan úı shárkesi ǵana bar zeınetker áıel túngi aıazda qatty tońǵan eken. Óziniń kim ekenin, qaıdan júrgenin aıtatyn shamasy bolmady. Úı ıeleri de keıýanany bilmeıtin bolyp shyqty. Olar áıelge jyly kıim kıgizip jiberdi.
Polıtseıler keıýananyń kim ekenin, týystarynyń aty-jónin, mekenjaıyn suraǵanymen naqty jaýap ala almady. Túrli famılııalardy atap, kezekshi bólim solardyń birimen onyń qaıda turatynyn anyqtady.
Patrýldi polıtsııa keıýanany úıge ákelgende týystary uıyqtap jatqan. Olar 91 jastaǵy analarynyń qashan shyǵyp ketkenin bilmegen. Aıazda tek qana kóılek-shárkeımen biraz jerge barǵanyn estigen olardyń qandaı kúıde bolǵany aıtpasa da túsinikti. Analaryn aman-esen taýyp, úıge ákelgen tártip saqshylaryna alǵystaryn jaýdyryp, ekinshi kúni keıýananyń qyzy polıtseılerdiń atyna alǵys hat joldady.
