SQO-da 900 mlrd teńgeniń 53 ınvestıtsııalyq jobasy júzege aspaq

PETROPAVL. QazAqparat – Soltústik Qazaqstan oblysynda ınvestıtsııalyq jobalardy júzege asyrý nátıjesinde jańadan 7 myń jumys orny ashylady, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, ótken 11 aıdyń ishinde óńirge tartylǵan ınvestıtsııa 20,4 %-ke artqan. Bul respýblıkalyq ortasha kórsetkishten anaǵurlym joǵary.

Jalpy oblysqa 2019 jylmen salystyrǵanda 36,9 mlrd teńge artyq, ıaǵnı barlyǵy 226 mlrd teńge ınvestıtsııa kelgen.

Óńirde 900 mlrd teńgeniń 53 ınvestıtsııalyq jobasy iske qosylmaq. Nátıjesinde jańadan 7 myń jumys orny qurylady degen jospar bar.

Bıyl oblysta kirpish zaýyty, avtoklavty kirpish pen plıtalardy shyǵaratyn kásiporyn ashylady. Qańtar aıynda fanera kombınaty jumysyn bastaıdy.

Petropavldaǵy iri kásiporyn «Radýga» JShS qaǵaz óndirisin jolǵa qoımaq.

Buǵan deıin bıg-beg, termos vagondar óndirisi iske qosyldy. Qazir iri joba – Data-ortalyqtyń qurylysy júrip jatyr.

«2019 jyldyń sońynda oblysta «Qyzyljar» arnaıy ekonomıkalyq aımaǵy quryldy. Bul bizdiń kásipkerler men ınvestorlarǵa tıimdi. Olarǵa salyqtyq jáne kedendik jeńildikter jasalady. Bir jyldyń ishinde biz 3 jobany bastadyq, olar: elektrtehnıkalyq qondyrǵy shyǵaratyn kásiporyn, kópsalaly oblystyq aýrýhana jáne aýylsharýashylyǵy tehnıkasyn shyǵaratyn nemistiń «CLAAS» kompanııasynyń zaýyty qurylystary», - deıdi SQO ákimi Qumar Aqsaqalov.

SQO-da bolashaǵy zor ınvestıtsııalyq jobalardy iske qosý arqyly aldaǵy 5 jylda ónerkásiptik ónimdi 70-80 mlrd teńgege arttyryp otyrý kózdelgen.