SQO-da 900 medqyzmetkerge vaktsına egildi
SQO-daǵy koronavırýs ınfektsııasyna qatysty jaǵdaı boıynsha búgin densaýlyq saqtaý basqarmasy basshysynyń orynbasary Qumar Kúsemisov pen oblystyń bas sanıtar dárigeri Áset Jumataev aıtyp berdi.
Áset Jumataev óńirde alǵashqylardyń biri bolyp KVI-ǵa qarsy ekpe jasatty.
«1-aqpan kúni vaktsına egildi. Birinshi kúni, árıne ıne salǵan jer aýyrdy. Álsizdik boldy. Vaktsına alǵanyma búgin úshinshi kún. Ózimdi jaqsy sezinemin. Aýytqýlar bolǵan joq. Sol sebepti barlyǵyn ekpe salýǵa shaqyrtý túskende odan bas tartpaýǵa shaqyramyn. Osylaısha biz ózimizdiń ǵana emes, jaqyndarymyzdyń densaýlyǵyn da qorǵaımyz», - dedi SQO-nyń bas sanıtar dárigeri.
Qazirgi tańda SQO-da medıtsına qyzmetkerleriniń 900-i vaktsına alyp úlgerdi.
«Óńirde vaktsına qoıý josparly túrdi ótip jatyr. Ekpe alǵandar dárigerlerdiń baqylaýynda. Úsh kún boıy qońyraý shalyp, jaǵdaılaryn bilip turady. Osy kúnge deıin eshqandaı asqynýlar tirkelgen joq.
Immýndyq vaktsına bolǵandyqtan onyń aǵzaǵa óz áseri bar. Alǵashqy kúnderi dene qyzýy kóterilip, ıne salǵan jer aýyrýy múmkin. Álsizdik bolady. Bul – qalypty jaǵdaı.
Vaktsına alǵandardyń ishinde 4 adamda dene qyzýy 37,5-38 gradýsqa deıin kóterildi. Olar paratsetamol ishti», - deıdi densaýlyq saqtaý basqarmasy basshysynyń orynbasary Qumar Kúsemisov.
Dárigerdiń aıtýynsha, medıtsına qyzmetkerleriniń arasynda ekpe jasatýdan bas tartqandar bolmaǵan.
«Medıtsına qyzmetkerleri vaktsına alýdyń qanshalyqty mańyzdy ekenin jaqsy túsinedi. Óıtkeni búgingi tańda KVI-men kúrestiń eń tıimdi joly osy vaktsına salǵyzý. Óıtkeni ázirge vırýsty joıatyn preparattar tabylǵan joq.
Karantındik shekteý sharalarynyń, árıne, juqtyrǵandar sanyn azaıtýda nátıjesi bar. Biraq bul ınfektsııany biz ujymdyq ımmýnıtet alý arqyly ǵana jeńe alamyz», - dedi Qumar Kúsemisov.
SQO-da búginde koronavırýs ınfektsııasyn juqtyrǵandar sany 11 179 adamǵa jetti. Óńirdiń ınfektsııalyq statsıonarlarynda qazir 452 adam em alyp jatyr. Emdeý oryndary 38 %-ǵa ǵana tolyq.
