SQO-da 900-den asa nysan múmkindigi shekteýli jandarǵa beıimdelgen

ASTANA. KAZINFORM — Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Soltústik Qazaqstan oblysynda 909 áleýmettik ınfraqurylym nysany tolyq beıimdeldi, dep habarlaıdy Eńbekmıni.

Qazirgi ýaqytta Qazaqstan Respýblıkasynda 2025-2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.

«Amanat» partııasynyń jol kartasynda 2023-2027 jyldar aralyǵynda ınteraktıvti qoljetimdilik kartasyna (budan ári — Karta) engizilgen 42 myńnan astam nysandy beıimdeý boıynsha jumys kózdelgen. Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly — Kartadaǵy obektilerdiń 20%, 2024 jyly — 40%, 2025 jyly — 60%, 2026 jyly — 80%, 2027 jyly — 100%-y beıimdeledi. Qazirgi ýaqytta el boıynsha 23611 nysan tolyqtaı beıimdelgen.

Búgingi tańda Soltústik Qazaqstan oblysynda 909 nysan beıimdeldi. 2025 jyldyń sońyna deıin 931 nysandy beıimdeý josparlanyp otyr.

Beıimdelgen nysandardyń jalpy sanynan múgedektigi bar adamdardyń barlyq sanattary úshin qoljetimdileri:

— densaýlyq saqtaý nysandary– 81;

— bilim berý nysandary — 301;

— mádenıet nysandary — 74;

— memlekettik jáne kvazımemlekettik uıymdar — 299;

— sport nysandary — 23;

— áleýmettik qorǵaý nysandary — 7;

— kólik ınfraqurylymy nysandary — 10;

— keńseler — 13;

— saýda nysandary menoıyn-saýyq ortalyqtary — 92;

— basqada nysandar — 9.

— Qazir aýrýhanalarǵa barý da, sportpen aınalasý da, belsendi ómir súrý de burynǵydan áldeqaıda jeńil boldy. Bul biz úshin óte mańyzdy, sebebi qoǵamnyń tolyqqandy múshesi bolyp sezinýge jáne artyq kedergilerge táýeldi bolmaýǵa múmkindik beredi, — dep bólisti Petropavl qalasynyń turǵyny, ekinshi toptaǵy múgedektigi bar Arman Ahmetov.

Budan basqa, Soltústik Qazaqstan oblysy boıynsha halyqty áleýmettik qorǵaý salasyndaǵy retteý jáne baqylaý komıtetiniń departamenti 2025 jyldyń basynan bastap profılaktıkalyq baqylaý sheńberinde 14 jáne jospardan tys baqylaý sheńberinde 26 tekserý júrgizdi. Tekserý qorytyndysy boıynsha anyqtalǵan buzýshylyqtardy joıý týraly 23 nusqama engizildi.

Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet.Nusqama belgilengen merzimde oryndalmaǵan jaǵdaıda aıyppul salynatyn bolady.

Osyǵan deıin SQO-da skrınıngiden ótken ár úshinshi adamnan týberkýlez ınfektsııasy anyqtaldy.