SQO-da 9 óner ujymy «halyqtyq» dárejesin aldy

PETROPAVL. QazAqparat – Soltústik Qazaqstan oblysynda kórkemónarpazdar ujymynyń 9-y – «halyqtyq», taǵy 5 ujym «úlgili» dárejesin aldy, dep habarlaıdy QazAqparat tilshisi.

Byltyr SQO-da 14 ujym «halyqtyq» jáne «úlgili» mártebesin alý úshin ótinish berdi. Olardyń bireýi – qalalyq, qalǵany aýyldyq kórkemónerpazdar. Sondaı-aq beseýi – balalar kórkemónerpazdar ujymy.

«Halyqtyq» dárejesin alý úshin ártisterdiń jasy 18-den asýy kerek. Al balalardyń óner ujymdaryna «úlgili» ataǵy beriledi. «Halyqtyq» dárejeni alýdyń birneshe talaby bar. Eń birinshisi – ujymnyń qurylǵanyna 5 jyldan kem bolmaýy kerek. Osy aralyqta olar úzdiksiz óner kórsetýi qajet. Joǵary oryndaýshylyq sheberlik, repertýary aýqymdy, ádemi kostıýmderi bolýy kerek. Materıaldyq-tehnıkalyq bazasy eskeriledi. Dárejeni alarda olar 9 kontserttik nómirdi usynady. Quramynda Mádenıet jáne sport mınıstrliginiń bas sarapshysy bar komıssııa ujymdardyń ónerin sarapqa saldy», - deıdi SQO halyq shyǵarmashylyǵy jáne mádenı-bos ýaqyt qyzmeti ortalyǵynyń bólim jetekshisi Tatıana Zatsarınına.

Ótinish bergenderdiń biri – Tımırıazev aýdanyndaǵy Merkel otbasylyq trıosy. Ujymnyń kórkemdik jetekshisi Andreı Merkel Tımırıazev aýdandyq mádenıet úıin basqarady. Otbasylyq trıoǵa Andreıden basqa onyń ákesi jáne anasy kiredi. Ótken ǵasyrdyń jetpisinshi jyldary qurylǵan óner ujymy endi «halyqtyq» dárejesin alyp otyr.

«Ákem Andreı 1972 jyly Tımırıazev aýdanyna qonys aýdardy. Osy jerde anammen kezdesip, otbasyn qurdy. Olardyń ekeýi de ónerge jaqyn. Ákem mýzyka jazady, anam óleń shyǵarady. Men olardyń týyndysyn mýzykalyq óńdeımin. Ákem sondaı-aq perneli mýzykalyq aspaptarda, gıtarada oınaıdy. Men esimdi bilgennen fortepıanany meńgerdim. Azdap gıtara men baıanda oınaımyn. Biz tek qana ózimizdiń avtorlyq ánderimizdi oryndaımyz», - deıdi Andreı Merkel.

Olardyń ánderi negizinen Otan, mahabbat, otbasy, týǵan jerge súıispenshilik týraly.

«Halyqtyq» ataǵyn alǵanymyzǵa men eń aldymen ata-anam úshin qýandym. Olar mádenıet salasyna kóp ómirin arnady. Ákem aýdandyq mádenıet úıinde qanshama jyl kórkemónerpazdar ujymyn basqardy. Olar kóptegen baıqaýlardyń jeńimpazdary. Bizdiń trıo da túrli jeńisten kende emes. Eńbegimizdiń elengenine qýanyshtymyz», - deıdi Merkel otbasylyq trıosynyń kórkemdik jetekshisi Andreı Merkel.

SQO-da 200-den astam kórkemónerpazdar ujymy bolsa, sonyń 88-niń «halyqtyq», «úlgili» dárejesi bar. Olardyń 27-si qalalyq bolsa, qalǵany - aýyldyq.