SQO-da 9 myńnan astam balaǵa jańa oqý jylynda kómek kerek

PETROPAVL. QazAqparat – Soltústik Qazaqstan oblysynda materıaldyq jaǵdaıy tómen otbasylardyń 9 myńnan astam balasyn mektepke daıyndaýǵa kómek qajet, dep habarlaıdy QazAqparat tilshisi.

SQO-da materıaldyq kómek qajet etetin turmysy nashar, kóp balaly otbasylardyń jáne jalǵyzbasty analardyń balalaryna «Mektepke jol» aktsııasy aıasynda qoldaý kórsetilip jatyr.

Petropavldaǵy órt sóndirý qyzmetiniń qyzmetkerleri № 5 órt sóndirý bóliminiń bólimshe komandıri bolǵan, 2015 jyly 31 jeltoqsan kúni oblys ortalyǵynda órt sóndirý kezinde qaza tapqan Altynbek Ábdirahmanovtyń otbasynda boldy.

SQO TJD baspasóz qyzmetiniń málimetinshe, Altynbek Ábdirahmanov 27 jasynda mert boldy. Onyń zaıyby Janar Ábdirahmanova búginde 10 jasar qyzy Darııa men 8 jasar uly Erasyldy jalǵyz ózi tárbıelep jatyr. Órt sóndirýshiler balalarǵa mektepke qajet oqý quraldaryn syılady.

SQO bilim basqarmasynyń málimetinshe, óńirde materıaldyq jaǵdaıy tómen otbasylardyń 9 myńnan astam balasy bar. Olardyń 2 300-ge jýyǵy ataýly áleýmettik kómek alyp júr.

«Kún saıyn balalarǵa mektep formasy men aıaq kıim satyp alýda kómek suraıtyn ata-analardan jáne olardyń zańdy ókilderinen ótinish kelip jatady. Bıyl mektep formasyn jáne keńse taýarlaryn alyp berý maqsatynda 70 mln 490 myń teńge bólingen. Búginge deıin 1 865 balaǵa 37 mln 973 myń teńgege kómek kórsetildi. Onyń ishinde 474 mektep oqýshysy qoldaýdy demeýshilerdiń esebinen qabyldady», - deıdi basqarma mamandary.