SQO-da 9 myńǵa jýyq muqtaj oqýshynyń mektep formasyna 1,2 mlrd teńge bólindi

PETROPAVL. QazAqparat – Soltústik Qazaqstan oblysynda áleýmettik osal topqa jatatyn 9 myńǵa jýyq oqýshy bar. Bul balalarǵa jalpyǵa mindetti bilim berý aıasynda jalpy somasy 1,2 mlrd teńge kómek kórsetilmek, dep habarlaıdy QazAqparat tilshisi.

Naqtyraq aıtqanda, 8 701 balaǵa kómek beriledi. SQO bilim basqarmasynyń basshysy Názir Jáshibekovtiń aıtýynsha, ár balaǵa 37 myń teńge mólsherinde tólem jasalady. Buryn mektep formasy taratylsa, endi esepshotqa aýdarylatyn aqshaǵa ata-analar ózderi satyp ala alady.

Sondaı-aq, óńirde «Mektepke jol» respýblıkalyq aktsııasy ótip jatyr.

«Bizge kún saıyn ata-analardan jáne oqýshylardyń zańdy ókilderinen balalaryn mektepke daıyndaýǵa, mektep formasy men aıaq kıim alýǵa kómektesý týraly ótinish túsip jatyr. Barlyq memlekettik mekemelerge, bankterge, metsenattarǵa muqtaj otbasylarǵa kómektesýge shaqyryp hat joldadyq», - deıdi Názir Jáshibekov.

Bilim basqarmasy óńirdegi mektep formalaryn tigetin kásipkerlermen kezdesken.

«Mektep formasynyń ortasha baǵasy – 17 000 teńge turady. Sapasy barlyq talaptarǵa saı. Ol – pıdjak jáne shalbar. Biz oblystaǵy mektep formasyn ónirýshilermen sóılesip, baǵany ósirmeý qajettigin aıttyq. Mektep jármeńkelerin uıymdastyramyz. Olar aýdan ortalyqtarynda da ótedi. Ata-analar bul jerde kantselıarııalyq taýarlardy ǵana emes, kıim-keshek, aıaq kıimdi de arzan baǵamen ala alady», - dedi Názir Jáshibekov.

Mektepke qajetti zattardyń baǵasy SQO ákiminiń de qatań baqylaýynda bolmaq.

«Petropavl ákimi, aýdandardyń ákimderi jáne basqa da tıisti organdar mektepke qajet quraldardyń, mektep formasynyń jáne basqa da kerek-jaraq baǵasynyń óspeýin qadaǵalaýy kerek. Keı alypsatarlar qazirgi jaǵdaıdy paıdalanyp, baǵany aspandatyp jiberýi múmkin. Baǵany belgileý boıynsha memlekettik saıasat bar, sondyqtan biz baqylaýda ustaıtynymyzdy eskertkim keledi. Óte qatty qadaǵalaý bolýy kerek», - dedi oblys ákimi Qumar Aqsaqalov.