SQO-da 9 myńnan astam adam alkogolge qarsy zańnamany buzǵany úshin jazalandy

Soltústik Qazaqstan oblysynda jyl basynan beri 9 myńnan astam adam alkogolge qarsy zańnamany buzǵany úshin ákimshilik jaýapkershilikke tartyldy. Bir myńǵa jýyq adam kólikti mas kúıinde tizgindep, ustaldy, dep habarlaıdy Kazinform.

SQO Polıtsııa departamentiniń bastyǵy Aıdyn Qabduldınov ótken on aıdy qorytyndylady. Profılaktıkalyq jumys nátıjesinde qylmys sany 21 % azaıǵan. Desek te jol qaýipsizdigi máselesi óńirde ótkir tur. Jyl basynan beri oblys joldarynda 327 jol-kólik oqıǵasy tirkelgen, 39 adam mert bolyp, 463-i jaraqattandy.

«Jyldamdyqty asyrý, qarsy baǵytqa shyǵyp ketý, manevr jasaý kezinde erejeni eskermeý – jol-kólik oqıǵalarynyń basty sebepteri. Kólik júrgizýshilerinde tártip joq, barlyq tirkelgen jol apattarynyń 91,1% solardyń kinásinen bolǵan.

Jol erejesin buzǵany úshin 58 myńnan astam adam jazalandy. Olardyń jartysyna jýyǵy óreskel zań buzýshylyqtarǵa jol bergen», - deıdi Aıdyn Qabduldınov.

Kólikti mas kúıde basqarǵan 991 adam ákimshilik jaýapkershilikke tartyldy.

«Jol júrisi qaǵıdalaryn jaıaý júrginshiler, rólge masań kúıde otyrǵandar jáne jyldamdyq rejımin asyrǵandar buzady. Bul úsheýi joldaǵy adam ólimine ákelýdiń negizgi faktory bolyp otyr», - deıdi vedomstvo bastyǵy.

SQO-da sońǵy on aıdyń ishinde mas kúıde jasalatyn qylmystardyń sany 6,1% azaıǵan. Desek te osy aralyqta 9 myńnan astam adam alkogolge qarsy zańnamany buzǵany úshin jazalanǵan. Onyń ishinde 82-si alkogoldi satý talaptaryn buzǵany jáne 237-si spırttik ishimdikterdi zańsyz satqany úshin aıyppul tólegen. Aınalymnan lıtsenzııasy joq 8 myń lıtrge jýyq araq-sharap alyndy.

Jalpy qazirgi ýaqytta SQO-da maskúnem retinde 3 myńnan astam adam profılaktıkalyq esepte tur. Bıyl 193 maskúnem májbúrli túrde emdelýge jiberildi.