SQO-da 9 mamyr qarsańynda jaraqattanyp, aýrýhanaǵa túsken maıdanger qaıtys boldy

PETROPAVL. KAZINFORM — Soǵys ardageri Vasılıı Makıenko kóshede qulap, alǵan jaraqattarynan aıaǵyna turmastan búgin aýrýhanada qaıtys boldy.

Bul týraly Soltústik Qazaqstan oblysynyń ákimi Ǵaýez Nurmuhambetov áleýmettik jelidegi paraqshasynda habarlap, maıdangerdiń týǵan-týysyna kóńil aıtty. 

— Vasılıı Vasılevıchtiń ómir joly — erlik pen adal qyzmettiń jarqyn úlgisi. Ol maıdanǵa on segizge tolmaı jatyp shaqyrylyp, atqyshtar polkinde, onyń ishinde gvardııalyq quramda aýyr shaıqastardan ótti. Kórsetken erligi men batyrlyǵy úshin II dárejeli Otan soǵysy ordenimen jáne medaldarmen marapattaldy. Soǵystan keıin beıbit eńbekke belsene aralasyp, óńirdiń damýyna eleýli úles qosty. Sý sharýashylyǵy salasynda eńbek etip, tehnıkalyq jabdyqtaý óndirisi basqarmasy bastyǵynyń orynbasary qyzmetin 13 jyl atqardy. Bizdiń ardagerimiz ómirge qushtar, belsendi jáne salaýatty ómir saltyn ustanǵan, jas urpaqqa rýhtyń myqtylyǵy men naǵyz patrıotızmniń jarqyn úlgisi boldy. Ótken jyly ol óńir turǵyndarymen birge Máńgilik alaýǵa gúl shoqtaryn qoıý rásimine qatysqan sát barsha soltústikqazaqstandyq úshin erekshe áserli boldy. Kelesi jyly ol 100 jasqa tolar edi. Vasılıı Vasılevıchtiń erligi men eńbegi, jarqyn beınesi soltústikqazaqstandyqtardyń jadynda máńgi saqtalady, — dep jazdy oblys ákimi. 

Esterińizge salaıyq, Petropavlda jasóspirim qaǵyp qulatqan soǵys ardageri aýrýhanaǵa túskenin jazǵan edik.