SQO-da 9 qarashadan bastap avtovokzaldardyń jumysy toqtatylady
PETROPAVL. QazAqparat – Soltústik Qazaqstan oblysynyń bas sanıtarııalyq dárigerdiń qaýlysyna ózgeris engizildi. 9 qarashadan bastap oblys aýmaǵynda avtobýs qatynasy toqtaıdy, dep habarlaıdy QazAqparat tilshisi.
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, karantındik shekteýler Petropavl qalasy men Qyzyljar aýdanynda ǵana emes, barlyq oblys aýmaǵynda kúsheıtilmek. Jańa qaýly 9 qarasha kúni saǵat 00.00-den bastap kúshine enedi.
Barlyq turǵyndarǵa, sonyń ishinde jasy 65-ten asqandarǵa saǵat 22.00 men 06.00 aralyǵynda dári-dármek satyp alý sekildi asqan qajettilik bolmasa turǵylyqty jerinen ketpeý usynylady.
Oıyn-saýyq, saýda ortalyqtary, saýda úıleri dúısenbi-juma kúnderi saǵat 10.00 men 20.00 aralyǵynda ǵana jumys isteıdi. Senbi-jeksenbi kúnderi, ishindegi azyq-túlik dúkenderinen basqasy, jumysyn toqtatady. Bul aýmaǵy 500 sharshy metrden asatyn saýda ortalyqtaryna da qatysty. Qurylys dúkenderi senbi-jeksenbi kúnderi jumys isteıdi.
Aýmaǵy 500 sharshy metrge deıingi azyq-túlik emes buıymdaryn satatyn dúkenderdiń de jumys kestesinde ózgeris bar, olar senbi-jeksenbiden basqa kúnderi saǵat 8.00-20.00 aralyǵynda ashyq.
Sulýlyq salondary, shashtarazdar, kosmetıkalyq qyzmet kórsetetin ortalyqtar senbi-jeksenbi jumys istemeıdi.
Qoǵamdyq tamaqtaný oryndary ujymdyq is-sharalar ótkizbesten jáne dúısenbiden jumaǵa deıin jumys ýaqyty saǵat 08.00-den 21.00-ge deıin bekitildi. Zalda 30 orynnan aspaýy kerek, 30 orynnan az nysandar úshin tek 50% ǵana tolýy qajet. Senbi-jeksenbi kúnderi saǵat 08.00-den 21.00-ge deıin tamaqtaný obektileri tutynýshylarǵa ónimderin tek jetkizip berý arqyly jumys isteıdi.
Sondaı-aq SQO aýmaǵynda oblysishilik avtobýs qatynasy toqtaıdy. Avtovokzal, avtostansalardyń jumysy ýaqytsha shekteldi.
