SQO-da 86 jastaǵy áje adasyp, muzdaı sýǵa túsip ketken
PETROPAVL. KAZINFORM – Soltústik Qazaqstan oblysynda polıtseıler túngi ýaqytta adasyp, muzdaı sýǵa túsip ketken 86 jastaǵy áıeldi taýyp, qutqardy.
SQO Polıtsııa departamenti baspasóz qyzmetiniń málimetinshe, Aıyrtaý aýdany Saýmalkól aýylynyń turǵyny úıinen shyǵyp ketip, qaıta oralmaǵan. Kórshileri alańdap, shamamen saǵat 21:00-de polıtsııaǵa júgingen. Nátıjesinde dereý izdestirý jumystary uıymdastyryldy.
Іzdestirý sharalary barysynda tártip saqshylary áıeldiń Baıantaı aýyly baǵytyna qaraı aýdan ortalyǵynan shamamen tórt shaqyrym ketkenin anyqtaǵan. Kóp uzamaı zeınetkerdi krımınaldyq polıtsııa bólimshesiniń bastyǵy Dastan Talaspaev pen jedel ýákil Abylaıhan Qabdýshev tapty.
Shamamen saǵat 22:00-de temirjol boıyndaǵy aýmaqty tekserý kezinde polıtseıler qarańǵyda butalardyń synǵan dybysyn estıdi. Daýystap shaqyrǵanda eshkim jaýap bermegen, tek birshama ýaqyttan keıin ǵana aqyryn shyqqan daýys estilgen. Estý qabileti nashar áıel fonar jaryǵyn baıqap, kómekke shaqyrǵan.
Áıel erigen qar sýy tolǵan oıyqqa túsip ketip, butalarǵa shyrmalyp, ózdiginen shyǵa almaı qalǵan. Uzaq ýaqyt sýyq sýda turyp qalyp, ábden álsiregen.
Polıtseıler zeınetkerdi kóterip alyp shyqty. Jylytyp, úıine jetkizdi. Kórshileriniń aıtýynsha, ol buryn baǵyt-baǵdardan jańylý belgileri bolmaǵan.
Buǵan deıin Almaty taýlarynda eki jasóspirim qutqarylǵanyn jazǵan edik.
