SQO-da 85 jastaǵy bapkerler chempıondar tárbıelep júr

Solardyń biri – 85 jastaǵy Vıtalıı Dýrnev. Ol bıatlonnan jattyqtyrýshy. Tárbıelenýshileri Dmıtrıı Gýtov, Egor Kýcherenko osydan eki jyl buryn el chempıonatynda júldeli oryndarǵa ıe boldy.

Ekinshisi – konkımen júgirý sportynan bapker Aleksandr Sýrovıatkın. Onyń da jasy 85-te. Sporttyń osy túrinen jaqsy nátıje kórsetip júrgen apaly-sińlili Shýmekovalardy jattyqtyrady. Máselen, bıyl Krıstına Shýmekova Germanııada jasóspirimder arasynda ótken Álem chempıonatynda birneshe altyn medaldi jeńip aldy. Bul - tájirıbeli bapkerlerdiń eńbegi ólsheýsiz ekenin kórsetedi. Biraq mamandardyń jasy ulǵaıyp keledi.

SQO dene shynyqtyrý jáne sport basqarmasynyń málimetinshe, qazir oblysta júzý, basketbol, voleıbol, boks, grek-rım kúresi, shańǵy jarysy, velosport, dzıýdo, fýtbol, shaıbaly hokkeı sekildi kóptegen sport túrleri boıynsha maman jetispeıdi. Eń úlken suranys basketbol, júzý, velosport, semserlesý jáne grek-rım kúresine túsip otyr. Jalpy, zeınet jasyndaǵylardy qospaǵanda 81 jattyqtyrýshynyń orny bos tur.

Aýyl sportynda da maman jetispeýshiligi bar. Fýtboldan úsh, basketboldan úsh, bokstan eki, toǵyzqumalaqtan eki, kerlıngten eki jattyqtyrýshy qajet.

- Sońǵy úsh jylda oblysqa 83 jas jattyqtyrýshy jumysqa qabyldandy. Jastardy ustap qalý úshin qosymsha yntalandyrý sharalary da qolǵa alynǵan. Atap aıtqanda, jas mamandarǵa laýazymdyq jalaqynyń 30% mólsherinde ústemaqy tólenedi. Degenmen bul máseleni tolyq sheshpeı otyr, - deıdi basqarma basshysy Qarlyǵash Ramazanova.

Búginde óńirde 28 balalar men jasóspirimder sport mektebi jumys isteıdi, onyń ishinde 4 mamandandyrylǵan jáne 5 olımpıadalyq rezervtiń mamandandyrylǵan sport mektepteri bar. Bul mekemelerde 14 myńǵa jýyq sportshy shuǵyldanady.

Al jattyqtyrýshylardyń jalpy sany 750-den asady. Onyń 360-y aýyldyq jerlerde eńbek etedi.

Buǵan deıin «Bolashaq oıyndary – 2026» týrnırine 900-den astam sportshy qatysatyndyǵyn jazǵan edik.