SQO-da 84 adam shoshqa tumaýyn, tórt adam gonkong tumaýyn juqtyrǵan
PETROPAVL. KAZINFORM – Soltústik Qazaqstan oblysynda epıdemııalyq maýsym bastalǵaly 100 adamǵa tumaý dıagnozy qoıyldy.
SQO sanıtarııalyq-epıdemıologııalyq baqylaý departamenti basshysynyń mindetin atqarýshy Arman Kúshbasovtyń aıtýynsha, A tıpti tumaýdy juqtyrǵandar sany basym. H1N1-pdm-09 (shoshqa tumaýyn) 84 adam, maýsymdyq H1N1 – 3 adam jáne H3N2 (gonkong tumaýyn) 4 adam juqtyrǵan.
- A tıpti tumaý ádette aýyr ótedi. Bıylǵy maýsymda onymen aýyrýdyń 91 jaǵdaıy tirkeldi. V úlgidegi tumaýdy 9 adam juqtyrǵan. Jalpy syrqattardyń 35-i – 14 jasqa deıingi bala bolsa, tórteýi – júkti áıel. Naýqastardyń eshqaısy tumaýǵa qarsy ekpe almaǵan, - deıdi Arman Kúshbasov.
Al osy epıdemııalyq maýsymnyń basynan óńirde jiti respıratorlyq-vırýstyq ınfektsııanyń 75 122 jaǵdaıy tirkeldi, ótken jyldyń sáıkes kezeńimen salystyrǵanda bul 24% tómen, byltyr epıdemııalyq maýsymda 93016 adam dárigerge qaralǵan. Juqtyrǵandardyń 67% - 14 jasqa deıingi balalar.
- Sońǵy aptada JRVI-men 1170 adam aýyrdy. Syrqattanǵandar sany ósip otyr. Ótken aptamen salystyrǵanda 5% kóp. JRVI men tumaý aýrýynyń negizgi belgileri: joǵary temperatýra, jalpy ıntoksıkatsııa, álsizdik, tamaq aýrýy, muryn bitelýi.
Alǵashqy belgileri baıqalǵan kezde ózin-ózi emdeýge bolmaıdy, dereý medıtsınalyq kómekke júginý qajet, dárigerdi úıge shaqyrý kerek, aýrýdy taratpaý úshin naýqas balany balabaqshaǵa nemese mektepke jibermeý kerek. Durys emdelmegen jaǵdaıda asqynyp, eń kóp taralǵany jáne qaýiptisi – ókpeniń qabynýyna ákelýi múmkin, - deıdi Arman Kúshbasov.
Buǵan deıin SQO-da eki aı ishinde 160-qa jýyq adam janýarlardan zardap shekkenin jazǵan edik.