SQO-da 81 jastaǵy áıeldi aldaǵan jalǵan balger el aýmaǵynan shyǵaryldy
PETROPAVL. QazAqparat – Soltústik Qazaqstan oblysynda Reseıden kelgen áıel ózin balgermin dep tanystyryp, 81 jastaǵy ájeıdiń jıǵan-tergen qarjysyn aldap alǵan, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Aıyrtaý aýdanynyń polıtseıleri Mamlıýt aýdanyndaǵy áriptesterimen birge 81 jastaǵy zeınetkerge qatysty alaıaqtyq deregin ashty.
Belgisiz áıel eldi mekenderdiń birinde aýyl turǵynynyń esigin qaǵyp, bal ashyp berýdi usynǵan. Zeınetkerdi aldap-sýlap, onyń jıǵan-tergen 400 myń teńgesin qaltasyna basyp, izin sýytypty.
«Tergeýshiler jumys barysynda kúdiktiniń júrgen jolyn anyqtady. Ol aýdan aýmaǵynan ketip úlgergen. Oblys boıynsha alaıaqtyń belgileri taratylyp, polıtseılerge eskertildi. Nátıjesinde kúdiktige uqsas áıel Mamlıýt aýdanynda ustaldy. 1983 jyly týǵan reseılik óz kinásin moıyndap, zeınetkerden keshirim surady. Aqshasyn tolyq qaıtaryp berdi», - deıdi Aıyrtaý aýdandyq polıtsııa bólimi bastyǵynyń orynbasary Grıgorıı Lýkıanenko.
Tergeý barysynda sheteldiktiń óz qyzmetin usynyp, jurttyń mazasyn alǵany anyqtaldy. Kóshi-qon qyzmeti onyń bul áreketin QR ákimshilik quqyq buzýshylyqtyń 449 baby «Qoǵamdyq oryndarda tıisý» dep baǵalady. Osy baptyń úshinshi bóligi boıynsha sheteldik, ne azamattyǵy joq adamǵa 5 AEK mólsherinde aıyppuldan bastap 5 jylǵa deıin Qazaqstan Respýblıkasynyń aýmaǵynan shettetý jazasy kesiledi. Búgin sottyń úkimimen reseılik áıel el aýmaǵynan shyǵaryldy.
Jalpy jyl bastalǵaly SQO-da alaıaqtyqqa qatysty 178 qylmys tirkelse, sonyń 110-y ashyldy.
