SQO-da 800 mln teńgege jóndelgen jol eki jylǵa jetpeı shurq tesildi
PETROPAVL. QazAqparat – Soltústik Qazaqstan oblysynda «Ádildikti talap et» aktsııasynyń qorytyndysy shyqty. Іs-sharany uıymdastyrýshylar óńirdiń jol qurylysy salasynda kóptegen olqylyq bar ekenin jáne qomaqty bıýdjet qarajaty jelge ushqanyn anyqtady, dep habarlaıdy QazAqparat tilshisi.
Petropavldaǵy Antıkor ortalyǵynda ótken jıynǵa «Ádildikti talap et» aktsııasynyń uıymdastyrýshysy «Ádildik joly» respýblıkalyq qoǵamdyq birlestiginiń fılıaly, sybaılas jemqorlyqqa qarsy qyzmet ókilderi jáne múddeli memlekettik mekemelerdiń mamandary qatysty.
«Ádildik joly» RQB óńirlik fılıalynyń basshysy Aınagúl Nurahmetovanyń aıtýynsha, jumys barysynda joldardy salý, jóndeý jáne kútip ustaý kezinde sybaılas jemqorlyq táýekelderin anyqtaýǵa jáne avtojol salasyndaǵy problemalarǵa basa nazar aýdarylǵan.
«Anyqtalǵan olqylyqtardy birneshe topqa bóldik. Sonyń biri – jol qurylysynyń barlyq kezeńinde materıaldardyń sapasy men tehnologııalardyń saqtalýyna qatysty.
Máselen, 2019-2020 jyldary aýdandyq mańyzy bar jol – Asanovo eldi mekenine kireberis 800 mln teńgeden astam qarajatqa ortasha jóndeldi. Biraq eki jyl ótpeı jatyp jolǵa qaıta jóndeý qajet. Bul jerden júk kóligi ótpeıdi, óıtkeni aýylda iri kásiporyndar joq. Al joldy salǵan kompanııanyń kepildik merzimi bıyl qazan aıynda aıaqtalmaq», - deıdi Aınagúl Nurahmetova.
Ekinshi toby basqarýdyń tıimdiligimen baılanysty.
«Qazir jol jóndeý boıynsha satyp alýdy memlekettik mekemeler uıymdastyryp, tapsyrys beredi. Al olardyń shtatynda avtojol salasynda bilimi bar mamandar joq. Mysaly, Lebıaje eldi mekenindegi kóshe joldaryn jóndeý konkýrsyn negizgi qyzmeti «mamandandyrylmaǵan dúkenderdegi bólshek saýda» jáne «avtokólikterge tehnıkalyq qyzmet kórsetý jáne olardy jóndeýmen» aınalysatyn kásipker jeńip alǵan. Onyń jol salýda jáne jóndeýde tájirıbesi joq, biraq bul konkýrsta jeńiske jetýge kedergi bolmaǵan. Saldarynan eldi mekendegi jol tósemesiniń ár jerde bir jurnaǵy ǵana qalǵan», - deıdi Aınagúl Nurahmetova.
Aıtýynsha, bul avtojol salasyndaǵy túıitkilderdiń tolyq tizbesi emes.
«Avtojol salasynyń damýyna nysandardy tapsyrý merzimderin birneshe ret keıinge shegerý áser etedi, bul ınflıatsııa aıasynda jobalardyń qymbattaýyna ákep soǵady. Sebepterin kórsetpeı, Mamlıýt aýdanynyń sáýlet, qurylys, turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi tórt ret «Aııa – Servıs» JShS-men jasaǵan shart merzimin uzartqan. Fırma aýdandyq mańyzy bar «Qyzylásker-Razdolnoe 17 km» avtomobıl jolyn ortasha jóndeýi tıis. Aqjar aýdanynyń «Bostandyq-Kıevskoe» joly da osy sebeppen merziminde jóndelip bitpeı jatyr. Byltyr jeltoqsan aıynyń basynda kelisimshart jasalǵanymen, keıin kelisimshart merzimi tórt ret uzartyldy. Búginde 57 shaqyrymnyń jeteýi ǵana jóndeldi», - deıdi Aınagúl Nurahmetova.
Qoǵamdyq birlestik basshysynyń aıtýynsha, avtojol salasyndaǵy problemalar salalyq ta, salaaralyq da sıpatqa ıe. Olar uzaq qarjylandyrý merzimimen, jol-qurylys materıaldarynyń sapasyn baqylaý kezinde jetkilikti deńgeıde jaýapkershiliktiń bolmaýymen, qurylystyń, jóndeýdiń barysyn tehnologııalyq qadaǵalaýdyń, paıdalanýdyń kepildik merzimi kezeńinde baqylaý júıesiniń jáne basqa da birqatar sebeptermen baılanysty.
